Fraktflug hafið frá Akureyri

Norðanflug ehf. hóf á sunnudag reglulegt fraktflug milli Akureyrar og Belgíu. Áætlað er að fljúga þrjár ferðir í viku og er önnur ferðin farin í dag, þriðjudag. Norðanflug er nýtt fyrirtæki í eigu Samherja, Saga Capital bankans og Eimskips.

Kristján L. Möller samgönguráðherra segir ánægjulegt að fá meiri umferð og nýtingu á Akureyrarflugvöll. Fraktflug auki enn á vaxatar- og útrásarmöguleika fyrirtækja í byggðarlaginu og jafnframt muni farþegaflug um völlinn vonandi einnig aukast. Til að auka möguleikana enn frekar sé ráðgert að lengja flugbrautina og sé það verk nú í undirbúningi.

Sigurður Hermannsson, umdæmisstjóri Flugstoða ohf. í Norðurlandsumdæmi, segir reglulegt fraktflug góða viðbót. Hann segir undirbúning að lengingu flugbrautarinnar hafinn meðal annars með viðræðum við Skipulagsstofnun og Umhverfisstofnun vegna mögulegrar efnistöku. Segir hann áætlanir miða að því að undirbúningi ljúki á þessu ári og framkvæmdum á því næsta.

Unndór Jónsson er framkvæmdastjóri Norðanflugs en hann starfaði áður á flugrekstrarsviði Atlanta.