Sjálfbærni leiðarljós í formennsku Íslands í Norðurskautsráðinu
Sjálfbærni verður leiðarljós í formennsku Íslands í Norðurskautsráðinu sem hefst á næsta ári og málefni hafsins, loftslagsmál og vistvænar lausnir í orkumálum og lífshættir íbúa norðurskautsins verða meðal áhersluatriða Íslands á formennskutímanum. Þetta kom fram í máli Guðlaugs Þórs Þórðarsonar, utanríkisráðherra, sem hélt lokaræðu Hringborðs norðurslóða sem haldið var hér á landi í sjötta skipti og lauk nú síðdegis.
Í ræðu sinni kom Guðlaugur Þór einnig inn á stóraukið vægi norðurslóða í alþjóðastjórnmálum samhliða loftslagsbreytingum, og greindi frá aðgerðum ríkisstjórnarinnar til að sporna við og aðlagast áhrifum þeirra. Utanríkisráðherra lagði einnig áherslu á mikilvægi þess að viðhalda stöðugleika og friðsæld á norðurslóðum og innan Norðurskautsráðsins.
"Við stöndum frammi fyrir margvíslegum áskorunum, en ég er bjartsýnn á framtíð norðurslóða. Ef ég ætti að velja hugtök sem mestu máli skiptu fyrir þróun þessa heimshluta þá kæmu friður, stöðugleiki og sjálfbær þróun strax upp í hugann. Það er ekki einungis í okkar hag að búa þannig um hnútana, heldur höfum við öll ráð og getu til að tryggja sjálfbærni og velmegun á norðurslóð," sagði Guðlaugur Þór Þórðarson í lok ræðu sinnar.
Arctic Circle 2018: ræða Guðlaugs Þórs Þórðarsonar, birt af skrifstofu Hringborðs norðurslóða