Hoppa yfir valmynd

Samgönguáætlun

Samgöngu- og sveitarstjórnarráðherra skal leggja tillögu til þingsályktunar um stefnu í samgöngumálum, samgönguáætlun, til fimmtán ára fyrir Alþingi að lágmarki á þriggja ára fresti. Með henni setja stjórnvöld fram stefnu og markmið fyrir allar greinar samgangna. Samhliða skal leggja fram fimm ára áætlun um framkvæmdir, aðgerðaáætlun, fyrir fyrsta tímabil stefnunnar sem einnig skal endurskoðuð minnst á þriggja ára fresti.

Í gildi eru stefna í samgöngum 2011-2022 og aðgerðaáætlun 2015-2018.

Framtíð mótuð í nýrri samgönguáætlun

Ný heildarstefna samgönguáætlun til fimmtán ára var lögð fyrir Alþingi í október 2018. Annars vegar stefnumarkandi samgönguáætlun fyrir árin 2019–2033 og hins vegar aðgerðaáætlun fyrir fyrsta tímabilið, 2019–2023. Samgönguáætlun er í fyrsta skipti lögð fram í samræmi við fjármálaáætlun og því er fyrsta tímabil samgönguáætlunar að fullu fjármögnuð. Alls verða ríkisframlög til samgöngumála um 604 milljarðar kr. á tímabili samgönguáætlunar til ársins 2033. 

Kynning um nýja samgönguáætlun 2019-2033

Ráðherra hefur lagt fram á Alþingi þingsályktunartillögur um samgönguáætlun 2019-2033 og aðgerðaáætlun fyrir árin 2019-2023

Stefnumótun og áætlanagerð

Samgönguáætlun tekur til stefnu, fjáröflunar og útgjalda allra greina samgangna, þ.e. flugmála, vegamála og siglingamála, þ.m.t. almenningssamgangna, hafnamála, sjóvarna, öryggismála og umhverfismála samgöngugreina. Þar skal skilgreina það grunnkerfi sem ætlað er að bera meginþunga samgangna og gera grein fyrir ástandi og horfum í samgöngum í landinu. Við gerð samgönguáætlunar skal m.a. byggja á þeim meginmarkmiðum að samgöngur séu greiðar, hagkvæmar, öruggar og umhverfislega sjálfbærar auk þess sem þær stuðli að jákvæðri byggðaþróun.

Við gerð samgönguáætlunar skal einnig tekið mið af eftirfarandi markmiðum:

  • Að ná fram samræmdri forgangsröð og stefnumótun.
  • Að ná fram hagkvæmri notkun fjármagns og mannafla.
  • Að ná fram samræmdu skipulagi samgöngugreina og samstarfi stofnana ráðuneytisins og fyrirtækja á vegum þess.

Samgönguáætlun verður til í nokkrum þrepum. Ráðherra leggur fram áherslur sínar fyrir samgönguráð sem mótar tillögu að samgönguáætlun. Við undirbúning tillögunar fer fram víðtækt samráð við hagsmunaaðila, kynningarfundir haldnir en síðasti hlutinn í samráðsferli er samgönguþing sem haldið er reglulega. Að því loknu skilar samgönguráð ráðherra tillögu að samgönguáætlun. Það er loks ráðherra sem leggur fram á Alþingi tillögu til þingsályktunar um samgönguáætlun til umfjöllunar.

Skýrslur um framkvæmd samgönguáætlunar

Samgöngu- og sveitarstjórnarráðherra skal árlega leggja fram á Alþingi skýrslu um framkvæmd samgönguáætlunar. Fram til ársins 2008 voru lagðar fram skýrslur fyrir hverja grein samgangna fyrir sig en þá var tekin upp sú nýbreytni að gera grein fyrir framkvæmd allra greinanna í sameinaðri skýrslu. Vegagerðin, Samgöngustofa og Isavia ohf. leggja til efni við gerð skýrslunnar. Hér að neðan er að finna tengla á skýrslur um framkvæmd samgönguáætlana síðustu ára.

Sjá einnig:

Fréttir
Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira