Velferðarráðuneytið tók formlega til starfa 1. janúar 2011 samkvæmt lögum um breytingu á Stjórnarráð Íslands sem samþykkt voru á Alþingi 9. september 2010. Með lagabreytingunni voru heilbrigðisráðuneytið og félags- og tryggingamálaráðuneytið sameinuð og var velferðarráðuneytið stofnað á grunni þeirra. Verkefni velferðarráðuneytisins varða velferðar- og fjölskyldumál, heilbrigðisþjónustu, húsnæðismál, vinnumarkaðsmál og jafnréttismál.

Ráðherra, fer með yfirstjórn ráðuneytisins og ber ábyrgð á öllum stjórnarframkvæmdum þess. Sjá nánar um skiptingu starfa félags- og jafnréttismálaráðherra og heilbrigðisráðherra. 

Ráðuneytisstjóri stýrir ráðuneytinu undir yfirstjórn ráðherra. 

Skrifstofur velferðarráðuneytisins samkvæmt skipuriti þess eru sex, auk skrifstofu ráðuneytisstjóra; skrifstofa félagsþjónustu, skrifstofa gæða- og forvarna, skrifstofa hagmála og fjárlaga, skrifstofa heilbrigðisþjónustu, skrifstofa lífskjara og vinnumála og skrifstofa rekstrar og innri þjónustu. Skrifstofa hagmála og fjárlaga og skrifstofa rekstrar og innri þjónustu veita stoðþjónustu til fagskrifstofa velferðarráðuneytis. Þann 7. maí 2018 var ný ráðuneytisstofnun, Gæða- og eftirlitsstofnun félagsþjónustu og barnaverndar opnuð formlega og er hún starfrækt sem ráðuneytisstofnun sem telst ekki til aðalskrifstofu ráðuneytisins, en nýtur stoðþjónustu ráðuneytisins, eins og fagskrifstofur þess. Stofnunin (GEF) sækir umboð sitt til 17. gr. laga um Stjórnarráð Íslands nr. 115/2011. Með lagabreytingu nr. 82/2015 var veitt heimild til að setja á fót sérstakar starfseiningar eða ráðuneytisstofnanir sem væru starfræktar sem hluti af ráðuneyti.

Verkefni ráðuneytisins eru skilgreind í forsetaúrskurði um skiptingu stjórnarmálefna milli ráðuneyta í Stjórnarráði Íslands, nr. 84/2017.

• Um fjármál ráðuneytanna
• Merki ráðuneytisins
• Stefnur
• Helstu lög sem falla undir velferðarráðuneytið