Um 350 manns sátu ráðstefnu um málefni barna í gær
Húsfyllir var á ráðstefnunni; Snemmtæk íhlutun í málefnum barna á Íslandi – SIMBI – sem velferðarráðuneytið stóð fyrir og var haldin í gær. Upptaka frá ráðstefnunni ásamt glærum fyrirlesara er nú hægt að nálgast á vefnum.
Ásmundur Einar Daðason, félags- og jafnréttismálaráðherra sagði að ráðstefnunni væri ætlað að vera hvetjandi upphaf að þeirri vinnu sem stjórnvöld muni leggja áherslu á í málefnum barna. Stefnt sé að því að endurskoða allt félagslega kerfið eins og það snýr að börnum, stuðla að auknu samstarfi milli þeirra kerfa sem koma að málum barna á einhvern hátt: „Við ætlum að brjóta múra og byggja brýr til að bæta þjónustu við börn sem þurfa á liðsinni að halda og markmiðið er að börn sem þurfa liðsinni fái það eins fljótt og nokkur kostur er“ segir félags- og jafnréttismálaráðherra.