Teigasel II á Jökuldal, Fljótsdalshéraði, laust til ábúðar
Ríkisjörðin Teigasel II á Jökuldal, Fljótsdalshéraði er laus til ábúðar.
Sjávarútvegs- og landbúnaðarráðuneytið auglýsir til ábúðar ríkisjörðina Teigasel II á Jökuldal, Fljótsdalshéraði. Um er að ræða lífstíðarábúð. Umsóknarfrestur til ráðuneytisins er til 30. nóvember 2010.
Á jörðinni hefur verið rekið lítið fjárbú og er framleiðsluréttur jarðarinnar 58,5 ærgildi. Á jörðinni eru loðdýrahús, sem ekki hafa verið nýtt í nokkur ár. Aðrar byggingar eru íbúðarhús og fjárhús.
Teigasel II, Fljótsdalshéraði, er neðarlega á Jökuldal, á austurbakka Jökulsár á Brú. Nokkurt undirlendi með mýrum og holtum er milli Jöklu og hlíðar, hliðarbrekkan er allbrött og gróin og uppi í heiði eru flóar og móar.
Íbúðarhús, 221-6946 12: Grunnflötur 116 m², byggt árið 1977. Timburhús á steyptum grunni
Fjárhús, 222-1141 18: Grunnflötur 160 m², byggt árið 1991.
Refahús, 221-6947 13: Grunnflötur 612 m², byggt árið 1980.
Aðstöðuhús, 221-6948 14: Grunnflötur 126 m², byggt árið 1986.
Refahús, 221-6949 15: Grunnflötur 612 m², byggt árið 1986.
Minkahús, 221-6950 16: Grunnflötur 758,9 m², byggt árið 1989.
Aðstöðuhús, 222-1140 17: Grunnflötur 127 m², byggt árið 1991.
Minkahús, 223-5257 19: Grunnflötur 1198,8 m², byggt árið 1997.
Aðstöðuhús, 223-5258 20: Grunnflötur 98,5 m², byggt árið 1997.
Ræktað land, 221-7404 01: Tún eru samkvæmt fasteignamati 12 ha., þau eru gamalræktuð, óslétt og í misjöfnu ástandi.
Almennt um byggingarnar: Viðhaldi hefur ekki verið sinnt nægilega vel á undanförnum árum, þó má segja að húsin séu flest í sæmilegu ástandi.
Málningarvinna: Í 17. gr. ábúðarlaga nr. 80/2004 er kveðið á um að ábúanda sé skylt að halda við húsum, öðrum mannvirkjum, ræktun og hlunnindum þannig að þau rýrni ekki umfram eðlilega fyrningu. Staðan á Teigaseli II er þannig að viðtakandi ábúandi þarf að annast málningarvinnu.
Upphaf ábúðartíma: Almenn tímasetning ábúðarskipta, þegar um er að ræða lífstíðarábúð, er að miða við fardaga (byrjun júní), sbr. 36. gr. ábúðarlaganna. Í þessu tilviki er stefnt að því að nýr ábúandi taki fyrr við jörðinni og þá með samkomulagi við fráfarandi ábúanda og landeiganda.
Afgjald fyrir jörðina: Reglur ráðuneytisins um leigugjald má finna á heimasíðu. Í þessu tilviki miðast ársleigan við 3,25 % af fasteignamati jarðar, bygginga og ræktunar í upphafi ábúðartíma. Leigan tekur breytingum skv. byggingavísitölu á milli ára. Ársleiga fyrir fardagaárið 2009-2010 var kr. 667.097,-
ATH. Liðir 3 og 5 á umsóknareyðublaði um "Kaup á eignum fráfarandi ábúenda" á EKKI við nú vegna ábúðar að Teigasel II.
Við val á umsækjanda tekur ráðuneytið mið af landbúnaðarhagsmunum, eftirfarandi atriði eru metin sérstaklega:
1) Menntun á sviði landbúnaðar og önnur hagnýt menntun.
2) Starfsreynsla í landbúnaði.
3) Að áform umsækjanda um framtíðarnýtingu jarðarinnar teljist raunhæf að teknu tilliti til staðhátta og séu líkleg til styrkja nærsamfélagið.
Auk þessa getur ráðuneytið óskað eftir fjárhagslegum upplýsingum frá umsækjendum.
Fyrirspurnir sendist á netfangið [email protected], upplýsingar eru einnig veittar í síma 545 8300.