Hoppa yfir valmynd
22. nóvember 2018 Mennta- og menningarmálaráðuneytið

Staða embættis þjóðskjalavarðar er laus til umsóknar

Staða embættis þjóðskjalavarðar er laus til umsóknar. Þjóðskjalasafn Íslands er sérstök ríkisstofnun undir yfirstjórn ráðherra. Safnið er stærsta safn frumheimilda um sögu íslensku þjóðarinnar og þróun byggðar og mannlífs í landinu og er þess vegna sá grunnur sem rannsóknir, stjórnsýsla og mannréttindi hér á landi byggja á. Þjóðskjalasafn Íslands gegnir hlutverki sem framkvæmdaraðili opinberrar skjalavörslu og skjalastjórnar. Að auki gegnir safnið hlutverki opinbers skjalasafns. Um frekara hlutverk og starfsemi safnsins vísast nánar til ákvæða laga um opinber skjalasöfn nr. 77/2014.

Nánari upplýsingar um stofnunina er að finna á vefsíðu hennar

Hæfnikröfur
Umsækjendur skulu hafa háskólapróf sem nýtist í starfi og staðgóða þekkingu á starfssviði safnsins. Leitað er eftir einstaklingi með umfangsmikla stjórnunarreynslu, leiðtoga- og samskiptahæfni, reynslu af stefnumótunarvinnu og breytingastjórnun og hæfileika til nýsköpunar. Þekking og reynsla af stjórnsýslu, verkefnisstjórnun, áætlanagerð, fjármálum og rekstri er einnig mikilvæg. Leitað er eftir einstaklingi með góða almenna tölvukunnáttu og góða kunnáttu í íslensku, ensku og einu Norðurlandamáli.

Starfssvið og helstu verkefni
Sem forstöðumaður stýrir þjóðskjalavörður og ber ábyrgð á starfsemi og rekstri stofnunarinnar. Mikilvægt er að umsækjendur hafi skýra framtíðarsýn hvað þetta varðar. Stjórnarnefnd safnsins er þjóðskjalaverði til ráðgjafar um stefnu safnsins og veitir þjóðskjalaverði umsagnir um árlegar starfs- og fjárhagsáætlanir og skipulag safnsins. Forstöðumaður ræður starfsmenn stofnunarinnar og er í fyrirsvari fyrir hana. Forstöðumaður ber ábyrgð á að starfsemi safnsins sé í samræmi við lög og stjórnvaldsfyrirmæli. Hann ber ábyrgð á gerð fjárhagsáætlunar og að henni sé fylgt. Forstöðumaður er stefnumarkandi í skjalastjórnun og skjalavörslu ríkis og sveitarfélaga. Hann er leiðandi við setningu reglna og útgáfu leiðbeininga um skjalastjórn og skjalavörslu. Hann leiðir þróun í stýringu og vörslu rafrænna gagna. Safnið sinnir upplýsingagjöf, fræðslu og miðlun. Forstöðumaður sér um tillögugerð um leyfi til reksturs héraðskjalasafna og eftirlit með rekstri þeirra. Einnig sinnir forstöðumaður eftirliti með skjalavörslu afhendingarskyldra aðila. Embættið felur í sér setu í stjórnum og nefndum.

Persónulegir eiginleikar
Leitað er eftir einstaklingi sem sýnir frumkvæði og framsýni. Sjálfstæð, skipulögð og lausnamiðuð vinnubrögð eru einnig mikilvæg. Umsækjandi þarf að geta unnið undir álagi. Jafnframt er leitað að metnaðarfullum og faglegum einstaklingi með skipulagshæfni og þjónustulund.

Ráðning og kjör
Mennta- og menningarmálaráðherra skipar forstöðumann Þjóðskjalasafns Íslands, þjóðskjalavörð, til fimm ára í senn, sbr. 6. gr. laga um opinber skjalasöfn, nr. 77/2014, sbr. lög um réttindi og skyldur starfsmanna ríkisins, nr. 70/1996, með síðari breytingum. Ráðið er í starfið frá 1. mars 2019.

Um laun forstöðumanns fer eftir 39. gr. a í lögum um réttindi og skyldur starfsmanna ríkisins, nr. 70/1996.

Umsóknir
Umsóknir með greinargerð umsækjenda um framtíðarsýn fyrir Þjóðskjalasafn Íslands (út frá faglegum og rekstrarlegum áherslum) með upplýsingum um núverandi starfsheiti umsækjenda og ítarlegum upplýsingum um menntun og fyrri störf, skulu hafa borist mennta- og menningarmálaráðuneyti, Sölvhólsgötu 4, 101 Reykjavík eða á netfangið [email protected], eigi síðar en föstudaginn 14. desember 2018.

Nöfn umsækjenda verða birt á vef ráðuneytisins að loknum umsóknarfresti og verða umsóknir þar sem óskað er nafnleyndar ekki teknar til greina.
Nánari upplýsingar um starfið veitir Anna Maria Urbancic, rekstrarstjóri í mennta- og menningarmálaráðuneyti, í síma 545 9500 eða gegnum netfangið [email protected]

Umsóknarfrestur er til og með 14. desember 2018.


Mennta- og menningarmálaráðuneyti, 22. nóvember 2018.



Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn


Þessi síða notar vafrakökur Lesa meira