Hoppa yfir valmynd
7. október 2019 Mennta- og menningarmálaráðuneytið

Umsóknir um styrki á sviði lista og menningararfs og stofnstyrki til íþrótta- og æskulýðsmála

Mennta- og menningarmálaráðuneyti auglýsir eftir umsóknum um styrki af safnliðum á sviði lista og menningararfs og stofnstyrki til íþrótta- og æskulýðsmála.
Umsóknarfrestur er til kl. 24:00, mánudaginn 4. nóvember 2019.


Markmið og áherslur
Veittir eru styrkir til annarra en ríkisaðila þ.e. félaga, samtaka eða einstaklinga vegna verkefna á árinu 2020 sem ekki njóta lögbundins stuðnings eða falla undir sjóði eða sérstaka samninga.  Heildarframlag til úthlutunar er 47,2 m. kr. fyrir árið 2020.

Mennta- og menningarmálaráðuneyti veitir styrki til:

Lista og menningararfs
Veittir eru rekstrar- og verkefnastyrkir til félaga, samtaka og einstaklinga sem starfa á sviði lista og að verndun menningarminja sem ekki hafa aðgang að uppbyggingarsjóðum landshluta eða öðrum sjóðum lista og menningararfs.

Mannvirkja á sviði íþrótta- og æskulýðsmála
Veittir eru stofnstyrkir til að styðja við uppbyggingu, endurnýjun og viðhald íþróttamannvirkja og mannvirkja fyrir æskulýðsstarfsemi í samstarfi við sveitarfélög og fleiri aðila.

Ekki eru veittir styrkir til menntamála, vísinda eða annarra þeirra verkefna sem falla undir aðra málaflokka á verkefnasviði ráðuneytisins.

Mat á umsóknum:
Starfshópur metur styrkhæfi umsókna og gildi þeirra fyrir málefnasvið 18 og málaflokka innan þess. Mat á umsóknum skal einkum byggjast á eftirtöldum sjónarmiðum eftir því sem við á: 
a) gildi og mikilvægi verkefnis fyrir stefnu viðkomandi málaflokks, 
b) gildi og mikilvægi fyrir kynningu og markaðssetningu viðkomandi málaflokks, 
c) að umsækjanda takist að ná þeim markmiðum sem verkefnið miðar að, 
d) starfsferli og faglegum bakgrunni umsækjanda og annarra þátttakenda, 
e) fjárhagsgrundvelli verkefnis og/eða hvort umsækjandi hafi hlotið aðra styrki til sama verkefnis. 

Upplýsingar um gögn sem skulu fylgja umsókn er að finna í umsóknareyðublöðum.

Hafi umsækjandi áður fengið styrk til verkefnis þarf að liggja fyrir greinargerð um framkvæmd þess og ráðstöfun styrkfjárins til að ný umsókn komi til greina eða eins og kveðið er á um í skilmálum vegna fyrri styrkveitinga. Við mat á umsóknum er starfshópnum heimilt að leita umsagnar fagaðila, gerist þess þörf. 

Umsóknir sem ekki uppfylla skilyrði auglýsingar og úthlutunarskilmála verða ekki teknar til greina.
Ákvörðun um úthlutun mun liggja fyrir eigi síðar en 31. janúar 2020.

Auglýsing þessi byggir á 40. og 42. gr. laga um opinber fjármál nr. 123/2018 og  reglugerðum nr. 642/2018 um styrkveitingar ráðherra og 643/2018 um undirbúning, gerð og eftirfylgni samninga um framkvæmdir, rekstur og afmörkuð verkefni ásamt reglum nr. 208/2018 um úthlutun styrkja af safnliðum mennta- og menningarmálaráðuneytis.

Umsækjendum er gert að sækja um á rafrænu formi á umsóknavef Stjórnarráðsins (http://minarsidur.stjr.is)
· Aðgangur er veittur á kennitölu umsækjanda og verður lykilorð sent viðkomandi á netfang sem hann gefur upp við nýskráningu.
· Lykilorðinu má breyta eftir innskráningu með því að opna Mínar stillingar. Umsækjendur skrá sig inn með kennitölu og lykilorði og velja mennta- og menningarmálaráðuneyti á síðunni Eyðublöð.
· Heiti eyðublaðs:  Menningarstyrkir 2020

Nánari upplýsingar veitir Ásta Ingólfsdóttir í síma 545 9520 eða í tölvupósti á [email protected]


Umsóknarfrestur er til kl. 24:00, mánudaginn 4. nóvember 2019.

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira