Framtíðarsýn um rafræna stjórnsýslu
Fyrirtækið Hugvit hefur í samráði við stefnumótunarnefnd um upplýsingasamfélagið sem starfaði á vegum forsætisráðuneytis 2003-2004 unnið að skýrslu um framtíðarsýn um rafræna stjórnsýslu. Stefnumótunarnefndin vann að mótun þeirrar nýju stefnu um upplýsingasamfélagið sem kynnt var í mars 2004. Skýrslan var unnin jafnhliða stefnumótunarvinnunni. Markmiðið var að skýrslan nýttist ekki einungis þeim sem komu að stefnumótunarferlinu heldur einnig þeim sem koma að framkvæmd stefnunnar.
Í skýrslunni eru sett fram markmið varðandi rafræna stjórnsýslu og íbúalýðræði, óháð tæknilegum lausnum, með þarfir notandans að leiðarljósi. Leitast er við að varpa ljósi á það með hvaða hætti öryggi gagna og persónuupplýsinga sé best tryggt, án þess að hefta notagildi eða möguleika til hagræðingar. Tekið var tillit til mikilvægra þátta í stjórnsýslu svo sem gegnsæi og rekjanleika og lagðar fram tillögur að fyrirkomulagi sem muni auka skilvirkni og hagkvæmi þjónustu við alla hagsmunaðila og örva virka þátttöku almennings í stefnumótun og ákvarðanatökuferlum með notkun upplýsingatækni.