Hoppa yfir valmynd
17. apríl 2009 Félags- og vinnumarkaðsráðuneytið

Atvinnustyrkir til kvenna

Nokkrir styrkþegar ásamt ráðherraÁsta R. Jóhannesdóttir, félags- og tryggingamálaráðherra, veitti í dag 25 milljónir króna í styrki til atvinnumála kvenna. Sótt var um styrki til 261 verkefnis og hafa umsóknir aldrei verið fleiri.

Umhverfisvænar byggingareiningar, táknmálsvefur, rjómabú, baðhús í Stykkishólmi, þaraböð á Reykhólum, örlitameðferð til að bæta útlit eftir veikindi eða slys og hólkar úr bylgjupappír sem nota má sem skilrúm eru á meðal þeirra viðskiptahugmynda sem fá úthlutað úr sjóði félags- og tryggingamálaráðuneytis til atvinnumála kvenna að þessu sinni.

Í ár barst 261 umsókn en umsóknir hafa aldrei verið fleiri síðan byrjað var að veita styrkina árið 1991 að frumkvæði Jóhönnu Sigurðardóttur þáverandi félagsmálaráðherra. Nú eru til úthlutunar 25 milljónir króna. Alls er úthlutað til 38 viðskiptahugmynda og nema hæstu styrkirnir tveimur milljónum króna en þeir lægstu nema 300 þúsundum króna.

Ásta R. Jóhannesdóttir, félags- og tryggingamálaráðherra, afhenti styrkina við athöfn í Iðnó í dag. Ráðherra sagði að „það væri svo sannarlega mikil ástæða til þess nú að ýta undir frumkvöðlastarf og uppbyggingu nýrra atvinnutækifæra“. Ráðherra hrósaði umsækjendum fyrir hugmyndaauðgi og sagði „að verðlaunahugmyndirnar sýndu svo ekki væri um villst að á Íslandi væri sköpunarkraftur og kvenauður mikill“.

Tvær viðskiptahugmyndir fá úthlutað tveimur milljónum króna. Annar styrkurinn er til vöruþróunar og markaðssetningar á umhverfisvænum byggingareiningum sem geta nýst sem skjól og tengst saman í stærri skýli, lengju eða hring. Hinn styrkurinn er til þróunar táknmálsvefs þar sem hægt er að læra táknmál og fræðast um menningu og sögu táknmálsins.

Þá er 1,8 milljónum króna úthlutað til þróunar hugmyndar um rjómabú á Erpsstöðum til að framleiða ýmsar vörutegundir eins og ís, eftirrétti og osta. Baðhús sem nýtir heilsuvatnið í Stykkishólmi og þaraböð á Reykhólum fá hvort um sig úthlutað 1,5 milljónum króna. Einni milljón króna er veitt til vöruþróunar á hólkum úr bylgjupappír sem krækjast saman og mynda færanlegt skilrúm og þróun örlitameðferðar, svokallað medical tatto, sem er notað til að lagfæra útlit eftir veikindi eða slys.

Á meðal annarra viðskiptahugmynda sem fá styrk á bilinu 300–600 þúsund krónur má nefna þróun ungbarnamatar, barnagull, rauntímatæringamælingar og spilið litróf trúarbragða svo fátt eitt sé talið.  

Síðan styrkveitingarnar hófust fyrir 18 árum hefur fjöldi kvenna hlotið styrki til verkefna víðs vegar um landið og óhætt að fullyrða að þeir hafa oft skipt sköpum um framtíð, vöxt og viðgang góðra atvinnuhugmynda. Styrkirnir eru ætlaðir sem mótvægisaðgerð til að skapa konum tækifæri í viðskiptum og auka aðgengi þeirra að fjármagni. Um styrkina til atvinnusköpunar kvenna gilda þær reglur að styrkhæf verkefni skulu vera í eigu kvenna að minnsta kosti til helminga og stjórnað af konum. Þá skal verkefnið fela í sér atvinnusköpun til frambúðar og vera nýmæli á því sviði sem um ræðir. Auk þess eru gerðar kröfur um að viðskiptahugmyndin sé vel útfærð, markmið skýr og leiðir að þeim vel útfærðar.  

Á vefsvæðinu www.atvinnumalkvenna.is má fræðast nánar um verkefnin, styrkveitinguna og reglur sem um hana gilda.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum