VII. Umhverfisþing hafið
Um 300 manns eru mættir til leiks á VII. Umhverfisþing sem hófst á Hótel Selfossi nú í morgun þar sem meginumræðuefnið er náttúruvernd. Þingið hófst með ávarpi Svandísar Svavarsdóttur umhverfisráðherra þar sem hún fór m.a. yfir hvernig náttúruverndarmálum hefur vaxið ásmegin á undanförnum misserum. Þannig ætti náttúran sér stöðugt fleiri málsvara.
Umhverfisráðherra sagði Hvítbók um löggjöf til verndar náttúru Ísland, sem er til umræðu á þinginu, ryðja brautir í nýjum og vönduðum vinnubrögðum við undirbúning nýrrar löggjafar hér á landi.
Heiðursgestur Umhverfisþings er Ella Maria Bisschop-Larsen, formaður Dönsku náttúruverndarsamtakanna, sem fagna 100 ára afmæli sínu í ár. Fór hún í erindi sínu m.a. yfir hversu mikilvægu hlutverki náttúruverndarsamtök gegna í því að sýna stjórnvöldum aðhald. Þá ræddi hún friðlýsingar og hvernig Dönsku náttúruverndarsamtökin hafa tekið virkan þátt í friðlýsingarferlum í Danmörku.
Fjöldi fyrirlesara eru á dagskrá, en eftir hádegi skiptist þingið upp í fjórar málstofur, þar sem m.a. verðu rætt um framkvæmd náttúruverndaráætlunar, vísindaleg viðmið fyrir náttúruvernd og gildi náttúruverndar fyrir útivist og ferðaþjónustu auk þess sem ungmenni ræða náttúruverndarmál í sérstakri málstofu.