Óskað eftir umsögnum vegna breytinga á lögum um mat á umhverfisáhrifum

Fleiri framkvæmdir verða gerðar tilkynningarskyldar til Skipulagsstofnunar vegna ákvörðunar um hvort þær séu háðar mati á umhverfisáhrifum, samkvæmt drögum að frumvarpi til breytinga á lögum um mat á umhverfisáhrifum. Málsmeðferð fyrir þær framkvæmdir verður hins vegar einfölduð.

Samkvæmt drögunum verða framkvæmdir flokkaðar í þrjá flokka. Í flokk A falla þær framkvæmdir sem eru matsskyldar og í flokki B verða þær framkvæmdir sem kunna að vera háðar mati á umhverfisáhrifum en um er að ræða nánast óbreytta flokkun framkvæmda samkvæmt núgildandi lögum. Við bætist flokkur C en hann mun taka til þeirra framkvæmda sem sem kunna að vera háðar mati á umhverfisáhrifum en fallið hafa utan viðmiðunarmarka núgildandi laga. Sem fyrr segir verður málsmeðferðin hins vegar einfölduð varðandi þennan flokk.

Í drögunum eru aukinheldur lagðar til nokkrar breytingar á uppsetningu viðauka laganna. Eru breytingarnar með þeim hætti að viðaukarnir eru settir upp í töfluform og þannig gerðir aðgengilegri og einfaldari í sniðum.

Frumvarpsdrögin hafa nú verið send til umsagnar en frestur til að skila umsögnum er til 9. nóvember næstkomandi. Umsagnir skulu sendar í tölvupósti á [email protected] eða á:

Umhverfisráðuneytið

Skuggasundi 1

150 Reykjavík

Drög að frumvarpi til breytinga á lögum nr. 106/2000 um mat á umhverfisáhrifum