Loftslag og matur - Norræni loftlagsdagurinn 2011 er í dag
Katrín Jakobsdóttir, mennta- og menningarmálaráðherra, mun formlega setja loftslagsdaginn hérlendis með ávarpi í Norræna húsinu í dag, föstudaginn 11. nóvember kl. 15:00.
Norræni loftlagsdagurinn 2011 er í dag
Katrín Jakobsdóttir, mennta- og menningarmálaráðherra, mun formlega setja loftslagsdaginn hérlendis með ávarpi í Norræna húsinu í dag, föstudaginn 11. nóvember kl. 15:00.
Við það tækifæri verða ennfremur kynnt og veitt verðlaun fyrir matreiðslukeppni í Menntaskólanum í Kópavogi um hollasta skyndibitann.
Halldór Björnsson, frá Veðurstofunni og Dominique Plédel Jónsson frá Slow Food Reykjavík samtökunum fjalla um loftslag og mat. Nemendaverkefni unnin af nemendum í Grunnskóla Reyðarfjarðar og Barnaskóla Hjallastefnunnar í Garðabæ um loftslagsvænan mat verða kynnt.
Markmið loftslagsdagsins eru:
- að stuðla að þátttöku nemenda í umræðu um loftslagsmál,
- að efla norrænt skólasamstarf á sviði loftslagsmála,
- að stuðla að auknum skilningi og samskiptum á norsku, dönsku og sænsku meðal barna og ungmenna.
Keppnin um hollasta skyndibitann felst í því að undirbúa og framreiða skyndibita sem er hollur og byggir á lýðheilsumarkmiðum. Hann þarf að vera loftslagsvænn, bragðgóður og hafa norrænar matreiðsluhefðir að leiðarljósi. Verkefnið er ætlað nemendum í iðnnámsdeildum matvælagreina á Norðurlöndum.
