Velferðarráðuneytið

Fjármögnun tryggð fyrir byggingu 95 stúdentaíbúða í Reykjavík

Háskóli Íslands
Háskóli Íslands

Ríkisstjórnin samþykkti á fundi í morgun tillögu Guðbjarts Hannessonar velferðarráðherra sem heimilar Íbúðalánasjóði að veita Félagsstofnun stúdenta 90% lán með 3,5% vöxtum til að byggja 95 íbúðir í Brautarholti 7 í Reykjavík.

Áætlaður byggingarkostnaður er 1.400 milljónir króna og nemur lán Íbúðalánasjóðs því 1.260 milljónum króna. Ríkissjóður niðurgreiðir lánið sem nemur mismuninum á 3,5% vöxtum og almennum útlánsvöxtum sjóðsins. 

Nærri 300 nýjar íbúðir í notkun á þessu ári

Árið 2011 var sambærileg heimild veitt sem gerði Félagsstofnun stúdenta kleift að byggja hátt í 300 íbúðir í Vatnsmýrinni fyrir einstaklinga og pör og var áætlaður heildarkostnaður við þær framkvæmdir um fjórir milljarðar króna. Þessar íbúðir verða allar teknar í notkun fyrir lok þessa árs en fyrir á Félagsstofnun stúdenta samtals 815 herbergi; einstaklings-, par- og fjölskylduíbúðir til útleigu.

Langtímamarkmið Félagsstofnunar stúdenta er að tryggja 15% nemenda við Háskóla Íslands hentugt og vel staðsett leiguhúsnæði á sanngjörnu verði. Þetta er sambærilegt eða heldur lægra hlutfall en leigufélög á Norðurlöndunum bjóða. Til að uppfylla þetta markmið þarf Félagsstofnun stúdenta að byggja um 1.100 nýjar einingar, þ.e. herbergi eða íbúðir, en að lokinni úthlutun síðastliðið haust voru rúmlega 1.000 umsækjendur á biðlista eftir íbúð.

Deiliskipulag á lokastigi

Vinna við breytingar á deiliskipulagi vegna fyrirhugaðra framkvæmda er á lokastigi og fer þá í hefðbundið kynningar- og umsagnarferli. Að því loknu miðar Félagsstofnun stúdenta við að lokið verði við hönnun íbúðanna og samið við verktaka.

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn