Leyst úr húsnæðisvanda MS
Illugi Gunnarsson mennta- og menningarmálaráðherra og Jón Gnarr borgarstjóri undirrituðu í gær, 7. október 2013, samning ráðuneytisins og Reykjavíkurborgar um viðbyggingu við Menntaskólann við Sund. Hann kveður á um viðbyggingu og endurbætur á húsnæði skólans við Gnoðarvog. Í samræmi við yfirlýsingu milli mennta- og menningarmálaráðuneytis og Reykjavíkurborgar frá nóvember 2010 um samstarf í húsnæðismálum framhaldsskóla í borginni var ákveðið að farið yrði í brýnustu framkvæmdir við Menntaskólann við Sund. Þessar brýnustu framkvæmdir fela í sér stækkun skólans í samræmi við nemendafjölda auk bætts aðgengis mill álma skólans, sem eru frá ýmsum tímum, bætts aðgengis fyrir fatlaða með uppsetningu lyftu í húsið, bættri salernisaðstöðu og úrbóta vegna eldvarna.
Unnin var frumathugun um verkefnið hjá FSR, að undangenginni þarfagreiningu, þar sem niðurstaðan var að viðbyggingin þyrfti að vera um 2700 m2, auk breytinga, sem af þeim hljótast, á núverandi húsnæði. Ákveðið var að halda arkitektasamkeppni til lausnar verkefninu og bárust 19 tillögur. Í október 2012 valdi dómnefnd tillögu frá Skipark arkitektum í 1. sæti.
Heildarhönnun viðbyggingarinnar er nú lokið. Viðbyggingin verður tveggja hæða og hálf þriðja hæð að Gnoðarvogi , einnar hæðar fjölnotasalur í miðju skólans, með mötuneyti fyrir bæði nemendur og starfsfólk og hluti viðbyggingarinnar er einnig þriggja hæða tengigangur milli tveggja núverandi bygginga. Í viðbyggingunni verða tvær lyftur, sem alveg hefur vantað í skólann. Auk nýrrar viðbyggingar verða framkvæmdar breytingar á um 850 m2 í eldra húsnæðinu. Heildarstærð viðbyggingarinnar verður 2.832 m2, þannig að heildarstærð alls skólahúsnæðisins verður eftir stækkun um 7800 m2.
Áætlaður heildarkostnaður við framkvæmdirnar, bæði nýja viðbyggingu og breytingar á eldra húsnæði eru um 1.1 milljarður kr., þar af eru byggingarframkvæmdir áætlaðar um kr. 870 m.kr. Kostnaðarskipting á milli ríkisins og Reykjavíkurborgar er 60/40. Miðað er við að viðbyggingin verði tilbúin til innflutnings haustið 2015.