Hoppa yfir valmynd
24. október 2013 Matvælaráðuneytið

Orkumálaráðherrar Íslands og Papua Nýju Gíneu funda

Orkumálaráðherrahandaband
Orkumálaráðherrahandaband
Orkumálaráðherra Papua Nýju Gíneu Ben Micah er hér á landi fram á laugardag og í morgun fundaði hann með Ragnheiði Elínu Árnadóttur iðnaðar- og viðskiptaráðherra. Papua Nýja Gínea býr yfir miklum náttúruauðlindum og auk jarðhita má nefna vatnsafl, gas, ýmsa málma og auðug fiskimið. Á fundinum var undirrituð viljayfirlýsing milli Reykjavik Geothermal og PNG Power (ríkisorkufyrirtæki Papua Nýju Gíneu) vegna jarðhitaverkefna.

Orkumálaráðherrann er hér í boði iðnaðar- og viðskiptaráðherra og mun hann kynna sér sérstaklega hvernig Íslendingar hafa nýtt jarðhita, ekki einvörðungu til raforkuframleiðslu heldur einnig við húshitun, sundlaugar, gróðurhús o.fl. Í þessu samhengi er gaman að geta þess að þrír nemendur frá Papua Nýju Gíneu hafa lokið námi í Jarðhitaskóla Háskóla Sameinuðu Þjóðanna á Íslandi.

Auk orkumála bar m.a. málefni flugrekstrar og sjávarútvegs á góma. Icelandair hefur verið með starfsemi í Papua Nýju Gíneu undanfarin sjö ár; leigt flugvélar til ríkisflugfélagsins Air Niugini og þjónustað þær auk þess sem oft hafa íslenskar áhafnir flogið vélunum. Þá eru miklir ónýttir möguleikar til fiskveiða og fiskvinnslu í Papua Nýju Gíneu og mun ráðherrann m.a. heimsækja Sjávarútvegsskóla Háskóla Sameinuðu þjóðanna, auk þess að kynna sér framleiðslu á íslenskum bátum hjá fyrirtækinu Trefjum.
Hópmynd

Hafa samband

Ábending / fyrirspurn
Ruslvörn
Vinsamlegast svaraðu í tölustöfum