Samgöngu- og sveitarstjórnarráðuneytið

Málstofa um rafræna stjórnsýslu fyrir stjórnendur hjá ríki og sveitarfélögum

Frá málstofu um rafræna stjórnsýslu fyrir stjórnendur hjá ríki og sveitarfélögum

Forgangsmál er að gera hinum almenna borgara auðveldara með að eiga samskipti við hið opinbera, hvort sem er stofnanir á vegum ríkisins eða sveitafélaga til að bæta þjónustu og auka lýðræðislega þátttöku á hinum ýmsu sviðum, sagði Hanna Birna Kristjánsdóttir innanríkisráðherra m.a. við setningu málstofu um rafræna stjórnsýslu í dag. Að málstofunni stóðu innanríkisráðuneytið, Samband íslenskra sveitarfélaga og Félag forstöðumanna ríkisstofnana.

Fram kom í máli ráðherra að upplýsingatæknin væri meðal öflugustu vopna til að ná hagræðingu í opinberri stjórnsýslu og brýnt væri að stjórnendur gerðu sér grein fyrir mikilvægi hennar og gætu beitt henni af skynsemi. Ráðherra sagðist leggja áherslu á  netöryggismál og sneri það ekki síst að eflingu löggæslunnar og endurskoðun á réttarfari og sagði hún þessa umræðu ofarlega á baugi hjá norrænum starfsbræðrum.

Sérfræðingar á ýmsum sviðum rafrænnar stjórnsýslu fjölluðu um efni málstofunnar svo sem um stefnu ríkis og sveitarfélaga um upplýsingasamfélagið, um öryggismál, búnað og þjónustu, samráð á netinu við stefnumörkun og mótun lagafrumvarpa og nokkrir sögðu frá reynslu sinni af opinberri stjórnsýslu í sveitarfélögum og hjá ríkinu. Málstofan er undanfari námskeiða sem haldin verða á þessu og næsta ári í kjölfar könnunar sem gerð var í lok árs 2013 þar sem fram kom mikill áhugi forstöðumanna og forsvarsmanna sveitarfélaga fyrir málstofu sem þessari.

Markmið málstofunnar voru að auðvelda stjórnendum að forgangsraða verkefnum í upplýsingatækni, stuðla að aukinni samvinnu stofnana og sveitarfélaga um rafræna stjórnsýslu, auðvelda stjórnendum að greina hvað hægt er að gera strax til að ná betri árangri í rafrænni stjórnsýslu og styðja stjórnendur í að ná meiri árangri í framþróun í rafrænni stjórnsýslu og upplýsingatækni.

Dagskrá, glærur fyrirlesara og upptaka frá málstofunni

 

 

Efnisorð

Hafa samband

Ábending / fyrirspurn