Velferðarráðuneytið

Kynningarfundur um Þróunarsjóð innflytjendamála

Eygló Harðardóttir, félags- og húsnæðismálaráðherra
Eygló Harðardóttir, félags- og húsnæðismálaráðherra

Velferðarráðuneytið og innflytjendaráð efndu til opins fundar um Þróunarsjóð innflytjendamála föstudaginn 16. janúar.

Þróunarsjóðurinn hefur verið starfræktur frá árinu 2007 og hafa rúmlega eitt hundrað verkefni hlotið styrk úr sjóðnum. Sjóðurinn hefur 10 milljónir króna til ráðstöfunar árlega – og við hverja úthlutun leggja stjórnvöld áherslu á ákveðna þætti sem þau telja ástæðu til að styrkja sérstaklega. Lögð hefur verið áhersla á að styrkja fjölbreytt verkefni og sem dæmi má nefna leikrit, útvarpsþætti, fræðslu gegn fordómum, vinnumarkaðsúrræði og fjölda rannsókna. Við hverja úthlutun hafa stjórnvöld lagt áherslu á ákveðna þætti sem þau telja ástæðu til að styrkja sérstaklega.

Dagskrá kynningarfundarins var tvíþætt. Eygló Harðardóttir, félags- og húsnæðismálaráðherra, gerði grein fyrir áherslum stjórnvalda við úthlutun úr sjóðnum árið 2015 og styrkþegar ársins 2014 fluttu kynningar á verkefnum sínum. Í máli Eyglóar kom fram að á vorþingi verður lögð fram fyrsta lögbundna framkvæmdaáætlunin í málefnum innflytjenda og byggja áherslur Þróunarsjóðsins í ár á  meginefni hennar. Framkvæmdaáætlunin er sett saman úr fjórum stoðum sem snúa að samfélaginu, málefnum fjölskyldna, menntun og vinnumarkaði. Hún nær til áranna 2015–2018 og tilgreinir 24 verkefni á málefnasviðum þriggja ráðuneyta. Gerð er tillaga að margvíslegum verkefnum sem meðal annars snúa að mælingum á viðhorfum samfélagsins til innflytjenda og fjölmenningar, greiningu og aðgerðum gegn brottfalli nemenda af erlendum uppruna í framhaldsskólum landsins og veitingu hvatningarverðlauna til þeirra sem gera vel í málefnum innflytjenda svo einhver dæmi séu nefnd.

Eygló benti á mikilvægi þess að stjórnvöld hafi í huga við alla stefnumótun að fjölmenning styrki innviði samfélagsins. Hún vék að atburðum síðustu vikna í Evrópu og sagði að fræðsla væri besta forvörnin gegn fordómum. „Félagsleg virkni innflytjenda á öllum sviðum þjóðlífsins er einnig nauðsynleg vegna þess að hún er forsenda þess að við öll fáum notið þeirrar fjölbreytni sem fjölmeningarsamfélagið byggir á,“ sagði Eygló.  

Á fundinum voru kynnt þrjú verkefni sem hlutu styrk úr Þróunarsjóði innflytjendamála árið 2014. Dr. Hallfríður Þórarinsdóttir, mannfræðingur og forstöðumaður MIRRA, miðstöðvar innflytjendarannsókna við ReykjavíkurAkademíuna, og Anna Woytynska, doktorsnemi í mannfræði, kynntu fyrstu niðurstöður rannsóknar sinnar á húsnæðisaðstæðum pólskra innflytjenda á höfuðborgarsvæðinu. Elísabet Karlsdóttir, framkvæmdastjóri Rannsóknastofnunar í barna- og fjölskylduvernd kynnti rannsókn um þróun á sambandi pólskrar og íslenskrar menningar og aðstandendur félagsins Projekt Polska, sem er vettvangur fyrir fólk sem vill byggja upp menningarleg samskipti milli Íslands og Póllands, kynntu nýja heimasíðu félagsins. Projekt Polska var stofnað árið 2012 af hópi Pólverja sem býr á Íslandi eða er tengdur landinu á einn eða annan hátt.

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn