Hoppa yfir valmynd
1. október 2015 Forsætisráðuneytið

Forsætisráðherra ávarpaði leiðtogafund Ban Ki-moon um flóttamannavandann og fólksflutninga

Forsætisráðherra Íslands með flóttamannafulltrúa Sameinuðu þjóðanna (UNCHR) eftir fund þeirra í gær - mynd

Forsætisráðherra flutti ávarp í gær á leiðtogafundi í boði Ban Ki-moon aðalframkvæmdastjóra Sameinuðu þjóðanna um aukna og árangursríkari samvinnu um flóttamannavandann og fólksflutninga í tengslum við ný heimsmarkmið. Í ávarpi sínu lagði forsætisráðherra áherslu á að mikilvægt sé að nálgast flóttamannavandann á heildstæðan máta og í náinni samvinnu ríkja. Veita verði sterka aðstoð til ríkjanna í kring um Sýrland þar sem þrýstingurinn er mestur.  

Forsætisráðherra átti einnig tvíhliða fund með flóttamannafulltrúa Sameinuðu þjóðanna (UNHCR) þar sem rætt var um gríðarlega aukningu fólks á vergangi og flóttamanna og þá alvarlegu stöðu sem uppi er. Þakkaði flóttamannafulltrúinn fyrir mikilsvert framlag Íslands og Íslendinga. Þá átti forsætisráðherra tvíhliða fund með framkvæmdastjóra Palestínuflóttamannaaðstoðar Sameinuðu þjóðanna (UNRWA) þar sem einnig var þakkað fyrir framlag Íslands. 

Í gær sótti forsætisráðherra jafnframt leiðtogafund um aðgerðir gegn ISIL og öðrum öfgasamtökum, í boði Bandaríkjaforseta. Á fundinum kom meðal annars fram að búist sé við langri baráttu og að samstaða ríkja heims sé grundvöllur árangurs í baráttunni gegn ISIL og öðrum öfgasamtökum. 

Þá var forsætisráðherra viðstaddur opnun almennrar umræðu í allsherjarþingi Sameinuðu þjóðanna í vikunni og sótti móttöku Bandaríkjaforseta Barack Obama af því tilefni ásamt eiginkonu sinni Önnu Sigurlaugu Pálsdóttur.

Fyrr í vikunni flutti forsætisráðherra ávarp á fundi um orkumál og átak Sameinuðu þjóðanna um orku fyrir alla 2030, þar sem hann lagði meðal annars áherslu á mikilvægi þess að árangursríku samkomulagi í loftslagsmálum yrði náð á fundi ríkja heims í París í desember og hvatti leiðtoga ríkja heims til að styðja framsýnar orkubreytingar í heiminum með því að taka virkan þátt í verkefni Sameinuðu þjóðana um Sjálfbæra orku fyrir alla fyrir árið 2030. 

Einnig heimsótti forsætisráðherra verslunarkeðjuna Morton‘s fyrr í vikunni og ræddi við eigendur fyrirtækisins um áralöng viðskipti þeirra við íslenska framleiðendur sjávarafurða og drykkjarvara, en verslunarkeðjan hefur nú tekið íslenskar vörur í sölu á ný og eigendur hennar hyggja jafnvel á að fjölga vörutegundum frá Íslandi.

Hafa samband

Ábending / fyrirspurn
Ruslvörn
Vinsamlegast svaraðu í tölustöfum