Ráðherra á fundum AGS, Alþjóðabankans og OECD
Bjarni Benediktsson, fjármála- og efnahagsráðherra, fer fyrir sendinefnd ráðuneytisins sem sækir dagana 9.-11. október ársfund Alþjóðagjaldeyrissjóðsins (AGS) og Alþjóðabankans í Lima í Perú.
Helstu umræðuefni fundarins eru staða og þróun efnahagsmála á heimsvísu en sendinefnd Íslands fundar m.a. með fjármálaráðherrum, fjármálastofnunum, matsfyrirtækjum og starfsfólki AGS.
Í framhaldi af fundinum í Lima sækir fjármála- og efnahagsráðherra heimsfund Efnahags- og framfarastofnunarinnar (OECD) um áhrif bættra mælikvarða á velferð á stefnumótun stjórnvalda. Fundurinn er haldinn í Guadalajara í Mexíkó og stendur dagana 13.-15. október.
Ráðherra tekur á fundinum þátt í pallborði um hvaða áhrif ný viðhorf til mælinga á velferð hafi nú þegar haft á stefnumótun stjórnvalda.