Forsætisráðherra heimsótti varðskipið Tý á Möltu
Sigmundur Davíð Gunnlaugsson, forsætisráðherra, heimsótti í gær íslenska varðskipið Tý sem liggur við bryggju í Valletta á Möltu, en varðskipið sinnir nú gæslu og björgunarstörfum á Miðjarðarhafi fyrir FRONTEX.
Forsætisráðherra hitti skipverja og fékk kynningu á verkefnum Týs og Landhelgisgæslunnar á Miðjarðarhafi undanfarin ár þar sem meðal annars kom fram að áhöfn Týs hefði komið að björgun um 4.200 manns á verkefnatímanum.
Forsætisráðherra segir ákaflega mikilvægt að Íslendingar skuli geta tekið þátt í slíkum verkefnum á svo árangursríkan máta. Þá sé sérstaklega ánægjulegt að heyra frá öðrum þjóðum að Íslendingar standi framarlega hvað varðar þekkingu og fagmennsku. Þetta hafi meðal annars komið fram í máli þjóðarleiðtoga annarra landa.
Sigmundur þakkaði áhöfn Týs fyrir þeirra mikilvægu störf og sagði það vekja stolt að sjá Íslendinga standa sig svo vel í framlínunni á þessu svæði. Þátttaka Landhelgisgæslunnar í björgunarstörfum á Miðjarðarhafi væri sennilega eitt mikilvægasta framlag Íslands til að takast á við þann vanda sem fylgdi flóttamannastraumnum.