Fjármála- og efnahagsráðuneytið

80 fyrirtæki og stofnanir tóku þátt í Framadögum

Frá kynningu á Stjórnarráðinu á Framadögum 2016. - mynd

Framadagar háskólanna voru haldnir á dögunum í Háskólanum í Reykjavík. Framadagar hafa verið haldnir árlega frá árinu 1995 og eru viðburður þar sem fyrirtæki og stofnanir fá tækifæri til að kynna sig og starfsemi sína fyrir háskólanemum. Í þetta sinn tóku ríflega 80 fyrirtæki og stofnanir þátt í viðburðinum.

Frá upphafi hafa ýmsar ríkisstofnanir kynnt starfsemi sína á Framadögum og í ár tóku eftirfarandi stofnanir þátt: Einkaleyfastofa, Ferðamálastofa, Hagstofa Íslands, Landpítali, Nýsköpunarmiðstöð, Rannís, Samgöngustofa, Skipulagsstofnun og Vinnumálastofnun auk fulltrúa úr fjármála- og efnahagsráðuneytinu sem kynntu Stjórnarráðið sem heild.

Markmiðið með þátttöku ráðuneytisins var m.a. að efla jákvæða ímynd ríkisins sem vinnuveitanda og að sýna hina miklu breidd sem er til staðar í verkefnum ríkisins, milli starfsgreina og í stærð stofnana. Ef horft er til hlutfallslegrar skiptingar starfsmanna eftir menntun þá hafa um 65% ríkisstarfsmanna lokið formlegri háskólagráðu sem er umtalsvert hærra hlutfall en á almennum vinnumarkaði og er hlutfallið jafnvel ívið hærra hjá Stjórnarráðinu þar sem um 77% starfsmanna hafa lokið námi í háskólagrein. Einna algengast er að starfsmenn Stjórnarráðs hafi lokið námi í lögfræði, hagfræði, viðskiptafræði, stjórnmála- eða stjórnsýslufræðum.

Framadagar eru haldnir að erlendri fyrirmynd, þ.e. svokallaðir Career days. Þeir eru á vegum AIESEC alþjóðlegs félags háskólastúdenta. Markmið þeirra er að auka tengsl milli atvinnulífsins og háskólanna í landinu. Þá eru þeir kjörinn vettvangur fyrir stofnanir til að kynna sig og starfsemi sína fyrir háskólanemum, sem eru hugsanlegir framtíðarstarfsmenn.

 

Framadagar voru haldnir 10. febrúar 2016.

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn