Samningur um hafnríkisaðgerðir til að uppræta ólöglegar veiðar öðlast gildi
Hinn 5. júní 2016 öðlaðist gildi samningur Matvæla- og landbúnaðarstofnunar Sameinuðu þjóðanna um hafnríkisaðgerðir til að fyrirbyggja, hindra og uppræta ólöglegar, ótilkynntar og eftirlitslausar veiðar Samningurinn var undirritaður af fulltrúa Íslands 22. nóvember 2009.
Samningurinn um hafnríkisaðgerðir er fyrsti bindandi alþjóðasamningur á sviði fiskveiða síðan svonefndur úthafsveiðsamningur var gerður árið 1995. Samningurinn er nátengdur efni úthafsveiðisamningsins, en í 23. gr. þess samnings er ríkjum fengin heimild og lögð á þau skylda til að beita hafnríkisreglum í lögsögu sinni til að stuðla að virkni alþjóðlegrar verndunar og stjórnarráðstafana. Við gerð samningsins var tekið mið af og litið til óbindandi leiðbeininga FAO um hafnríkisaðgerðir, sem voru helsta fyrirmynd hafnríkisreglna NEAFC, Norðaustur-Atlantshafsfiskveiðinefndarinnar, og NAFO, Norðvestur-Atlantshafsfiskveiðistofnunarinnar, sem Ísland ásamt öðrum strandríkjum við Norður-Atlantshaf hefur innleitt.
Tillaga um gerð samningsins kom fram á framlengdri ríkjaráðstefnu um endurskoðun úthafsveiðisamningsins sem haldin var í New York 22.-26. maí 2006. Þá um haustið beindi allsherjarþing Sameinuðu þjóðanna í New York því til Matvæla- og landbúnaðarstofnunar Sameinuðu þjóðanna (FAO) að hefja viðræður sem hófust síðan árið 2007. Alls hafa 29 ríki fullgilt samninginn, en 25 ríki þurftu að fullgilda hann, svo hann öðlaðist gildi. Ísland fullgilti samninginn í framhaldi þingsályktunar á 144. löggjafarþingi 2014-2015 (þskj. 686), en áður höfðu verið gerðar nauðsynlegar breytingar á lögum. Þá má geta þess að ráðuneytið lét nýlega í té skýrslu til FAO um innleiðingu samningsins í íslenskan rétt, en framundan er umtalsverð vinna á vegum stofnunarinnar við að fá fleiri ríki til að gerast aðilar að samningnum.