Hoppa yfir valmynd
14. júní 2016 Mennta- og barnamálaráðuneytið

Endurskoðaðar verklagsreglur fagráðs eineltismála í grunnskólum

Breytingar  voru gerðar í samráði við Samband íslenskra sveitarfélaga og Skólastjórafélag Íslands og byggja m.a. á reynslu af störfum fagráðsins.

Nýlega voru birtar á vef Stjórnartíðinda endurskoðaðar verklagsreglur um starfsemi fagráðs eineltismála í grunnskólum, sem Illugi Gunnarsson mennta- og menningarmálaráðherra undirritaði í maí sl. Breytingar  voru gerðar á verklagsreglunum í samráði við Samband íslenskra sveitarfélaga og Skólastjórafélag Íslands og byggja m.a. á reynslu af störfum fagráðsins. Haft var að leiðarljósi við gerð breytinganna að verklagsreglurnar þjóni sem best tilgangi sínum.

Meðal helstu breytinga má nefna að fleiri aðilar en foreldrar og skólar geta nú óskað eftir aðkomu fagráðs. Bæst hafa við nemendur, starfsfólk skóla, auk annarra aðila sem starfa með börnum í skóla-, frístunda- eða tómstundastarfi með stoð í grunnskólalögum. Þessir aðilar geta óskað eftir aðkomu fagráðsins ef ekki tekst að finna fullnægjandi lausn innan skóla eða sveitarfélags, þrátt fyrir aðkomu starfsfólks skóla og skólaþjónustu sveitarfélaga. Sömu aðilar geta jafnframt vísað máli til fagráðs vegna meints aðgerðaleysis skóla eða sveitarfélags. Einnig er kveðið á um skipun varamanna ráðsins og hlutverk og ábyrgð verkefnastjóra skilgreint. 

Fagráðið starfar á ábyrgð mennta- og menningarmálaráðuneytis en Menntamálastofnun annast umsýslu þess. Starfsmaður þess er Erla Ósk Guðjónsdóttir, [email protected]

 Vakin er athygli á vefsíðu fagráðs eineltismála í grunnskólum: www.gegneinelti.is

Hafa samband

Ábending / fyrirspurn
Ruslvörn
Vinsamlegast svaraðu í tölustöfum