Leyfilegur heildarafli fiskveiðiárið 2016-17. Ráðgjöf Hafrannsóknastofnunar fylgt líkt og undanfarin ár.
Gunnar Bragi Sveinsson, sjávarútvegs- og landbúnaðarráðherra, hefur tekið ákvörðun um heildarafla tiltekinna fisktegunda fyrir næsta fiskveiðiár, 2016/2017 eftir samráð í ríkisstjórn. Ráðherra fylgir tillögum Hafrannsóknarstofnunnar um ráðlagðan heildarafla í öllum tegundum líkt og gert hefur verið undanfarin ár. Í samráði í ríkisstjórninni ítrekaði ráðherra nauðsyn þess að stórauka fjármagn til hafrannsókna.
„Ráðgjöf Hafrannsókarstofnunar var viss vonbrigði miðað við væntingar. Við erum að sjá ákveðin lúxusvanda á Íslandi vegna góðrar fiskveiðistefnu og þurfum að styrkja hafrannsóknir til þess að leita skýringa á því til dæmis hversvegna nokkrir árgangar þorsksins eru að léttast.“ Sagði Gunnar Bragi Sveinsson sjávarútvegs- og landbúnaðarráðherra.
Margir nytjastofna á Íslandsmiðum eru í ágætu jafnvægi og nýting þeirra hófleg, eins og segir í nýrri skýrslu Hafrannsóknastofnunarinnar. Veiðum úr mörgum mikilvægustu nytjastofnum á Íslandsmiðum er stýrt á grundvelli aflareglna sem hafa verið prófaðar af Alþjóða hafrannsóknaráðinu (ICES) og standast alþjóðleg varúðarsjónarmið.
Þessar aflareglur styrkja einnig stöðu íslenskra sjávarafurða á alþjóðamarkaði, enda er vaxandi áhersla markaðsaðila erlendis á að selja sjávarafurðir sem vottaðar eru sem sjálfbærar.
Um mikilvægasta nytjastofninn, þorskinn er það að segja að nýliðun undangengin allmörg ár hefur verið nokkuð undir meðallagi en stækkun stofnsins á undanförnum árum talin bein afleiðing af minni sókn.
Hafrannsóknastofnun ráðleggur lægra aflamark í nokkrum fiskistofnum. Það hefur vakið athygli hversu nýliðun margra hlýsjávarstofna hefur minnkað á undanförnum árum. Þannig hefur hallað undan fyrir keilu, löngu, blálöngu,skötusel, langlúru, humri og fleiri tegundum sem að mestu halda sig í hlýjum sjó við suður- og vesturströndina. Ástæður fyrir þessari neikvæðu þróun í nýliðun margra stofna eru ekki þekktar en nærtækast er að leita skýringa í breyttum umhverfisskilyrðum í hafinu við Ísland síðastliðin 10–15 ár.
Hafa skal í huga að í haust verður ákveðið aflamark 2017 fyrir mikilvæga uppsjávarstofna samkvæmt venju.
Í meðfylgjandi töflu er sýnd ákvörðun ráðherra um heildaraflamark fyrir einstaka fisktegundir og til samanburðar er heildaraflamark á yfirstandandi fiskveiðiári.
Tegund | Lestir 2016/17 | 2015/16 |
Blálanga | 2.040 | 2.600 |
Djúpkarfi | 12.922 | 10.000 |
Grálúða | 13.536 | 12.400 |
Gullkarfi* | 47.205 | 48.500 |
Gulllax | 7.885 | 8.000 |
Humar | 1.300 | 1.500 |
Íslensk sumargotssíld | 63.000 | 70.200 |
Keila* | 3.380 | 3.000 |
Langa* | 8.143 | 15.000 |
Langlúra | 1.110 | 1.100 |
Litli karfi | 1.500 | 1.500 |
Sandkoli | 500 | 500 |
Skarkoli | 7.330 | 6.500 |
Skrápflúra | 0 | 0 |
Skötuselur | 711 | 1.000 |
Steinbítur | 8.811 | 8.200 |
Ufsi | 55.000 | 55.000 |
Úthafsrækja | 4.100 | 4.000 |
Ýsa | 34.600 | 36.400 |
Þorskur | 244.000 | 239.000 |
Þykkvalúra/Sólkoli | 1.087 | 1.300 |
*Minni en ráðgjöf vegna veiða annara ríkja í samræmi við tvíhliða samninga þar að lútandi.