Mennta- og menningarmálaráðuneytið

Vísinda- og tækniráð samþykkir stefnu og aðgerðaáætlun til þriggja ára

Á fundi sínum mánudaginn 12. júní sl.  samþykkti Vísinda – og tækniráð stefnu og aðgerðaáætlun áranna 2017 til 2019.

Stefnan er í 5 köflum og inniheldur 10 aðgerðir með tilgreindum ábyrgðaraðila. Þær miða að því að auka afköst rannsókna- og nýsköpunarkerfisins með markvissri og vel grundaðri ákvarðanatöku og skilvirkni nýtingu fjármagns.

Stefnan er unnin samhliða stefnu þeirri sem birtist í fjármálaáætlun ríkisins fyrir árin 2018-2022.

Í ávarpi formanns ráðsins Kristjáns Þórs Júlíussonar mennta- og menningarmálaráðherra af þessu tilefni kom fram að samstarf ráðuneytisins við starfsnefndir ráðsins, vísindanefnd og tækninefnd,  sem unnu stefnuna hefur verið mikið og gott og sú reynsla og þekking sem býr í nefndunum hefur reynst afar mikilvæg. Þá hefur samstarf mennta- og menningarmálaráðuneytis við atvinnuvega - og nýsköpunarráðuneyti um stefnumótunina verið veigamikið og farsælt og gott samstarf  hefur verið við önnur  ráðuneyti sem að vinnunni hafa komið.  

Fyrsta aðgerðin sem sett verður af stað á grundvelli stefnunnar er að auglýst verður eftir  styrkjum í markáætlun um tungu og tækni. Gert er ráð fyrir að fylgja stefnunni eftir með reglulegum stöðuskýrslum.

Ráðherra lagði jafnfram áherslu á jöfn tækifæri kvenna og karla í rannsóknum og nýsköpun og að ekki gæti kynjahalla í fjármögnun rannsókna.

 Ráðherra nefndi einnig að hann sé að setja af stað endurskoðun á lagaumhverfi  Vísinda- og tækniráðs,  með það að markmiði að styrkja stöðu landsins á þessu sviði í alþjóðlegu umhverfi.  Þar verður m.a. verði horft til umbóta  á sambærilegum kerfum sem gerðar hafa verið í nágrannaríkjum á undanförnum árum.

Efnisorð

Hafa samband

Ábending / fyrirspurn