Drög til umsagnar að tillögu til þingsályktunar um stefnu stjórnvalda um uppbyggingu flutningskerfis raforku.
Á heimasíðu ráðuneytisins hafa verið lögð fram til kynningar og umsagnar drög að tillögu til þingsályktunar um stefnu stjórnvalda um uppbyggingu flutningskerfis raforku. Eru drögin í samræmi við ákvæði 39. gr. raforkulaga þar sem fram kemur að ráðherra skuli á fjögurra ára fresti leggja fram á Alþingi tillögu til þingsályktunar um stefnu stjórnvalda um uppbyggingu flutningskerfis raforku. Í drögunum er að finna almenn atriði er varða uppbyggingu flutningskerfis raforku og viðmið og meginreglur varðandi lagningu raflína. Byggja drögin m.a. á þingsályktun nr. 11/144, frá 28. maí 2015, um stefnu stjórnvalda um lagningu raflína.
Drögin að þingsályktunartillögunni voru unnin innan ráðuneytisins og eru þau nú lögð fram í opið umsagnarferli. Fyrirhugað er að leggja þingsályktunartillöguna fram á Alþingi á haustþingi 2017, í kjölfar hins opna samráðsferlis og að teknu tilliti til þeirra umsagna sem berast. Einstaklingar, hagsmunasamtök, fyrirtæki og stofnanir eru hvött til að koma á framfæri umsögnum og athugasemdum við meðfylgjandi drög. Frestur til að skila inn umsögnum til ráðuneytisins er til 1. september 2017 og skulu þær sendar á netfangið [email protected].