Ársskýrsla og staðtölur Sjúkratrygginga Íslands
Réttindagreiðslur Sjúkratrygginga Íslands árið 2016 námu 41.118 milljónum kr. eða 4,9% af heildarútgjöldum ríkisins. Útgjöldin jukust um 3.123 milljónir frá árinu 2015. Þetta og fleira má lesa í nýútkominni ársskýrslu stofnunarinnar þar sem fram koma upplýsingar um starfsemi hennar ásamt staðtölum sjúkratrygginga, slysatrygginga og sjúklingatryggingar ásamt ársreikningum.
Í tilkynningu á vef Sjúkratrygginga Íslands kemur meðal annars fram að í krónum talið hafi mesta kostnaðarhækkunin verið í lækniskostnaði en hann hækkaði á milli ára um 1.236 m.kr. Þar af hafi kostnaður vegna sérgreinalækninga hækkað um 730 m.kr.
„Kostnaður vegna lyfja með S-merkingu hækkaði um 685 m.kr. milli ára. Á árinu voru innleiddi fleiri ný leyfisskyld lyf en einnig eru áframhaldandi kostnaðaráhrif vegna nýrra lyfja sem samþykkt voru til innleiðingar 2015 og eru enn í innileiðingarfasa.
Hækkun réttindagreiðslna SÍ um 3.123 m.kr. á milli áranna 2015 og 2016 var 8,2%. Á sama tíma hækkaði vísitala neysluverðs um 1,7%.
Kostnaðarhlutdeild sjúkratryggðra var mjög breytileg eftir réttindaflokkum, t.d. er engin í kostnaði vegna S-merktra lyfja, nálægt 25% kostnaðarhlutdeild í almennum lyfjum en tæp 42% í sjúkraþjálfun.“