Dómsmálaráðuneytið

Samantekt gagna um uppreist æru frá 1995 lokið

Ráðuneytið hefur nú veitt þeim fjölmiðlum, sem þess hafa óskað, aðgang að gögnum í málum allra þeirra sem fengið hafa uppreist æru frá árinu 1995.

Tekið hefur verið mið af úrskurði úrskurðarnefndar um upplýsingamál frá 11. september sl. í máli nr. 704/2017 við vinnslu umræddra gagna. Þær upplýsingar sem leynt eiga að fara, sbr. 9. gr. upplýsingalaga nr. 140/2012 og fyrrnefndan úrskurð, hafa því verið afmáðar. Jafnframt hefur verið horft til laga um persónuvernd og meðferð persónuupplýsinga nr. 77/2000 og laga nr. 88/2008 um meðferð sakamála.

Rétt er að árétta að í einstökum tilvikum kann að orka tvímælis hve mikið af texta einstakra skjala rétt er að afmá, einkum varðandi afmörkun þess hvaða upplýsingar teljist viðkvæmar persónuupplýsingar. Þá hefur ráðuneytið ekki í öllum tilvikum staðfestar upplýsingar um hvort dómarar hafi ákveðið að birta refsidóma án nafns brotamanns vegna þess að birting á nafni ákærða teljist andstæð hagsmunum brotaþola.

Umrædd gögn í heild sinni varða 32 dæmda brotamenn sem veitt hefur verið uppreist æru á grundvelli gildandi laga síðastliðin 22 ár. Í þeim er að finna tæplega eitt hundrað umsagnir sem umsækjendur hafa lagt fram en í einstökum málum hafa umsækjendur lagt fram fleiri en tvær umsagnir. Sum þessara skjala bera ekki með sér að vera útgefin sérstaklega vegna umsóknar um uppreist æru. 

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn