Velferðarráðuneytið

Niðurstöður hönnunarsamkeppni um hjúkrunarheimili í Árborg

Frá afhendingu hönnunarverðlaunanna - myndVelferðarráðuneytið

Úrslit samkeppni um hönnun nýs hjúkrunarheimilis í Árborg voru kynntar formlega við athöfn á Selfossi í dag. Við sama tækifæri undirrituðu heilbrigðisráðherra og framkvæmdastjóri Árborgar samkomulag um stækkun heimilisins sem nemur tíu hjúkrunarrýmum.

Alls bárust 17 tillögur frá íslenskum og erlendum arkítektastofum. Í samkeppninni var meðal annars lögð áhersla á lausnir með góðu innra skipulagi og heimilislegu yfirbragði ásamt aðstöðu til útivistar, þar sem aðgengi og öryggismál væru höfð að leiðarljósi og góð vinnuaðstaða fyrir starfsmenn væri tryggð.

• Fyrstu verðlaun hlaut Urban arkitektar ehf. og LOOP architects aps.

• Önnur verðlaun hlaut ANDERSEN & SIGURDSSON ARKITEKTER

• Þriðju verðlaun hlaut Sei ehf.

Í meðfylgjandi áliti dómnefndar eru lýsingar á tillögum þátttakenda ásamt myndum.

Hjúkrunarheimilið mun rísa skammt frá bökkum Ölvusár, austan við sjúkrahúsið á Selfossi.

Gert er ráð fyrir að hönnun verði lokið og útboðsgögn tilbúin í ágúst 2018, framkvæmdir hefjist í október 2018 og verði lokið vorið 2020.

Hjúkrunarheimilið verður fyrir 60 íbúa

Upphafleg ákvörðun um byggingu hjúkrunarheimilisins miðaðist við 50 hjúkrunarrými og var sú ákvörðun kynnt í framkvæmdaáætlun um uppbyggingu hjúkrunarrýma í byrjun árs 2016. 

Í júní síðastliðnum samþykkti Alþingi nýja fjármálaáætlun til fimm ára og skapaðist með henni svigrúm til aukinnar uppbyggingar hjúkrunarrýma. Í framhaldi af því var í velferðarráðuneytinu gerð áætlun um byggingu 155 hjúkrunarrýma til ársins 2022, til viðbótar þeim 313 rýmum sem þegar eru á framkvæmdastigi samkvæmt eldri áætlun. 

Með gerð nýrrar framkvæmdaáætlunar var ákveðið að heimila stækkun hjúkrunarheimilisins sem byggt verður í Árborg úr 50 rýmum í 60. Við athöfnina á Selfossi í dag undirrituðu Óttarr Proppé heilbrigðisráðherra og Ásta Stefánsdóttir, framkvæmdastjóri sveitarfélagsins Árborgar samkomulag þessa efnis. 

Óttarr og Ásta undirrita samkomulagið um stækkun hjúkrunarheimilisins

 

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn