Mennta- og menningarmálaráðuneytið

Ban Ki-moon segir að læra megi af Íslendingum í jafnréttismálum

Sjálfbærnistofnun Ban Ki-moon var sett á fót árið 2017 með það markmið að styðja við innleiðingu heimsmarkmiða Sameinuðu þjóðanna þar sem sérstök áhersla er lögð á málefni kvenna og ungs fólks.

Ban Ki-moon, sem var aðalritari Sameinuðu þjóðanna árin 2007-2016, átti fund með Lilju Alfreðsdóttur, mennta- og menningarmálaráðherra, og Líney Rut Halldórsdóttur framkvæmdastjóra ÍSÍ, í Pyeongchang í Suður-Kóreu nýverið. Á fundinum var m.a. rætt um valdeflingu ungs fólks og jafnrétti kynjanna. Þá komu íþróttir einnig við sögu en Ban Ki-moon var nýverið kjörinn formaður siðanefndar Alþjóða Ólympíunefndarinnar ásamt því að hafa komið á friðarsáttmála Ólympíuhreyfingarinnar (Olympic truce) og Sameinuðu þjóðanna, en sáttmálinn undirstrikar mikilvægi íþrótta í því að vinna að friði í heiminum. Ban Ki-moon lýsti yfir mikilli hrifningu á Íslandi og talaði sérstaklega um hið leiðandi hlutverk sem Ísland gegnir þegar kemur að jafnréttismálum.

Lilja Alfreðsdóttir, mennta- og menningarmálaráðherra, sagði: „Á fundi okkar kom fram að það eru ýmis álitlegir samstarfsfletir á milli Íslands og stofnunar Ban Ki-moon. Við Íslendingar höfum náð góðum árangri í jafnréttis- og æskulýðsmálum og eins og rætt var á fundinum. Það er ljóst að Ísland hefur ýmislegt til málanna að leggja í alþjóðasamstarfi og lýsti ég yfir vilja til að miðla reynslu okkar og þekkingu áfram. “

Ban Ki-moon stofnunin vinnur innan ramma heimsmarkmiða Sameinuðu þjóðanna og hefur að markmiði að vinna að friði, mannréttindum, útrýmingu fátæktar og valdeflingar kvenna og ungs fólks. Í heimsmarkmiðunum hefur hlutverk ungs fólks mikið vægi en sá hópur er einn níu hópa sem Sameinuðu þjóðirnar vinna sérstaklega með til þess að tryggja breiða þátttöku úr öllum kimum samfélagsins. 

Hafa samband

Ábending / fyrirspurn