Velferðarráðuneytið

Embætti skrifstofustjóra á skrifstofu heilbrigðisþjónustu laust til umsóknar

Velferðarráðuneytið í Skógarhlíð - myndVelferðarráðuneytið

Velferðarráðuneytið auglýsir laust til umsóknar embætti skrifstofustjóra á skrifstofu heilbrigðisþjónustu sem er önnur tveggja fagskrifstofa á heilbrigðissviði ráðuneytisins. Umsóknarfrestur er til 12. mars næstkomandi. Eftirfarandi er auglýsing um embættið sem einnig hefur verið  birt á starfatorg.is:

Embætti skrifstofustjóra á skrifstofu heilbrigðisþjónustu

Velferðarráðuneytið auglýsir laust til umsóknar embætti skrifstofustjóra á skrifstofu heilbrigðisþjónustu. Um er að ræða aðra af tveimur fagskrifstofum á heilbrigðissviði ráðuneytisins.

Meginhlutverk skrifstofu heilbrigðisþjónustu er að annast verkefni sem varða skipulag heilbrigðisþjónustu, sérhæfingu og verkaskiptingu þjónustuaðila. Einnig falla undir sviðið sjúkrahús, heilbrigðisstofnanir, heilsugæsla, heilbrigðisþjónusta utan stofnana, hjúkrunar- og dvalarheimili, læknisfræðileg endurhæfing, hjálpartæki og sjúkratryggingar. Lögð er áhersla á gott samráð og samstarf við stofnanir á málefnasviðum skrifstofunnar til að tryggja góða þjónustu og þau réttindi sem lög gera ráð fyrir.

Skrifstofustjóri stýrir og ber ábyrgð á málaflokkum sem heyra undir skrifstofuna sem og á verkefnum starfsmanna skrifstofunnar og útdeilingu þeirra. Í því felst stjórnun og rekstur skrifstofunnar, mannauðsstjórnun, skipulagning, áætlanagerð, stefnumótun, markmiðssetning, samhæfing verkefna við stefnu ráðuneytisins og mat og ábyrgð á árangri. Jafnframt ber skrifstofustjóri fjárhagslega ábyrgð eftir atvikum. 

Um er að ræða áhugavert og fjölbreytt starf í krefjandi starfsumhverfi þar sem reynir á öguð vinnubrögð, ábyrgð og sjálfstæði. Heilbrigðisráðherra skipar í embættið til fimm ára frá 1. júlí 2018. 

Menntunar- og hæfniskröfur:
• Háskólamenntun sem nýtist í starfi. Framhaldsmenntun æskileg.
• Yfirgripsmikil þekking og reynsla af málaflokkum sem heyra undir skrifstofuna.
• Stjórnunarreynsla og þekking á sviði verkstjórnar.
• Leiðtogahæfileikar.
• Þekking og reynsla á sviði opinberrar stjórnsýslu.
• Metnaður og vilji til að ná árangri.
• Frumkvæði, sjálfstæði í vinnubrögðum og skipulagshæfni.
• Gott vald á íslensku og færni til að tjá sig í ræðu og riti. 
• Góð kunnátta í ensku og a.m.k. einu Norðurlandamáli.
• Jákvæðni og lipurð í mannlegum samskiptum.

Sérstök hæfnisnefnd, skipuð þremur einstaklingum, mun meta hæfni umsækjenda og skila greinargerð til heilbrigðisráðherra. Nefndin starfar samkvæmt reglum nr. 393/2012, um ráðgefandi nefndir er meta hæfni umsækjenda um embætti við Stjórnarráð Íslands. Um embættið gilda lög nr. 115/2011, um Stjórnarráð Íslands, og lög nr. 70/1996 um réttindi og skyldur starfsmanna ríkisins. Um launakjör fer eftir kjarasamningi Félags háskólamenntaðra starfsmanna Stjórnarráðsins og fjármála- og efnahagsráðherra.

Upplýsingar um starfið veita Vilborg Ingólfsdóttir skrifstofustjóri ([email protected]) og Anna Lilja Gunnarsdóttir ráðuneytisstjóri ([email protected]) í síma 545 8100. Áhugasamir einstaklingar, án tillits til kyns, eru hvattir til að sækja um.

Umsókn skal fylgja ítarlegt kynningarbréf ásamt rökstuðningi um færni viðkomandi til að gegna embættinu. Einnig ferilskrá og upplýsingar um starfsheiti. Umsókn skal skila rafrænt á netfangið [email protected] eða til velferðarráðuneytisins Skógarhlíð 6, 105 Reykjavík eigi síðar en mánudaginn 12. mars 2018. Tekið skal fram að umsóknir geta gilt í sex mánuði frá því að umsóknarfrestur rennur út, sbr. reglur nr. 464/1996, um auglýsingar á lausum störfum, með síðari breytingum. Öllum umsóknum verður svarað þegar ákvörðun um skipun í embættið liggur fyrir. 

(Auglýsingin var birt á Starfatorgi 16. febrúar 2018)

Efnisorð

Hafa samband

Ábending / fyrirspurn