Velferðarráðuneytið

Bæklingurinn Konur og karlar á Íslandi 2018

Kyngreindar upplýsingar sem varpa ljósi á stöðu kynjanna, t.d. um búsetu, menntun, atvinnuþátttöku, launamun, stjórnunarstörf og þátttöku í stjórnmálum er að finna í nýútkomnum bæklingi sem Hagstofan gefur úr í samvinnu við Jafnréttisstofu og velferðarráðuneytið.

Bæklingurinn Konur og karlar á Íslandi er gefinn út ár hvert, bæði á íslensku og ensku. Hagstofan hefur einnig uppfært Lykiltölur um konur og karla þar sem stiklað er á stóru úr víðtækum kyngreindum gögnum Hagstofunnar.

Úr tilkynningu Hagstofu Íslands:

Rúmur helmingur kvenna 25–64 ára var með háskólamenntun árið 2017 samanborið við rúmlega þriðjung karla á sama aldri. Ef litið er til búsetu voru 56% kvenna og 43% karla á höfuðborgarsvæðinu með háskólamenntun en 41% kvenna og 20% karla utan höfuðborgarsvæðisins. Þá voru 39% karla og 26% kvenna á höfuðborgarsvæðinu með starfs- og framhaldsmenntun en 47% karla og 29% kvenna utan höfuðborgarsvæðisins. Hlutfall karla og kvenna sem voru eingöngu með grunnmenntun var um helmingi hærra utan höfuðborgarsvæðisins en á því.

Atvinnuþátttaka kvenna var tæp 79% árið 2017, þátttaka karla var rúm 86%. Óleiðréttur launamunur kynjanna var 16% árið 2016 en rúm 14% hjá fullvinnandi launþegum. Konur eru nú 38% alþingismanna og 44% kjörinna sveitarstjórnarmanna en í mörgum öðrum áhrifastöðum er hlutur kvenna lægri. Af átta hæstaréttardómurum er ein kona en konur voru 43% héraðsdómara í árslok 2017. Hlutfall kvenna í stöðu framkvæmdastjóra fer eftir stærð fyrirtækis og var það 22% hjá fyrirtækjum með 1-49 starfsmenn en 10% í fyrirtækjum með 250 starfsmenn eða fleiri árið 2016. Hlutfall kvenna af stjórnarmönnum var frá 26%–39% eftir stærð fyrirtækis.

Efnisorð

Hafa samband

Ábending / fyrirspurn