13. mars 2018 Forsætisráðuneytið

Umbætur á úrvinnslu og nýtingu launatölfræðiupplýsinga

Katrín Jakobsdóttir, forsætisráðherra, hefur skipað nefnd um umbætur á úrvinnslu og nýtingu launatölfræðiupplýsinga. Skipunin er í samræmi við niðurstöðu fundar stjórnvalda og aðila vinnumarkaðarins um launatölfræði þann 19. janúar sl. og er mikilvægur hlekkur í því samtali sem átt hefur sér stað undanfarnar vikur á milli stjórnvalda og aðila vinnumarkaðarins. Í því samtali hefur m.a. komið fram að bætt launatölfræði sé forsenda fyrir því að unnt sé að koma á fót nýju vinnumarkaðslíkani að norrænni fyrirmynd.

Nefndin mun skoða aðferðafræði um launatölfræði á Íslandi, alþjóðlega launatölfræði og alþjóðlegar skuldbindingar Íslands. Þá mun nefndin skoða þarfir vinnumarkaðarins á þessu sviði og hugmyndir um stofnun fastrar launatölfræðinefndar að erlendri fyrirmynd og gera tillögur um umbætur og úrvinnslu á nýtingu launatölfræðiupplýsinga.

Í nefndinni sitja Lárus Blöndal, ráðgjafi á sviði tölfræðiupplýsinga á skrifstofu stefnumála, fulltrúi forsætisráðuneytisins og formaður nefndarinnar, Pétur Jónasson, fulltrúi fjármála- og efnahagsráðuneytisins, Hanna Sigríður Gunnsteinsdóttir, fulltrúi velferðarráðuneytisins, Benedikt Valsson, fulltrúi Sambands íslenskra sveitarfélaga, Hrafnhildur Arnkelsdóttir, fulltrúi Hagstofu Íslands, Rannveig Sigurðardóttir, fulltrúi Seðlabanka Íslands, Emma Björg Eyjólfsdóttir, fulltrúi ríkissáttasemjara, Henný Hinz, fulltrúi Alþýðusambands Íslands, Helga Jónsdóttir, fulltrúi BSRB, Georg Brynjarsson, fulltrúi Bandalags háskólamanna, Oddur S. Jakobsson, fulltrúi Kennarasambands Íslands og Ólafur Garðar Halldórsson, fulltrúi Samtaka atvinnulífsins.

Gert er ráð fyrir að nefndin ljúki störfum fyrir lok árs 2018.

Efnisorð

Vinnumál

Hafa samband

Ábending / fyrirspurn

Efnisorð

Hafa samband

Skilaboðin hafa verið send ráðuneytinu til afgreiðslu.