Mennta- og menningarmálaráðuneytið

Verkefnastjórn um málefni Lánasjóðs íslenskra námsmanna skipuð

Lánasjóður íslenskra námsmanna - mynd
Verkefnastjórn um endurskoðun á lögum um Lánasjóð íslenskra námsmanna hefur nú verið skipuð af mennta- og menningarmálaráðherra, Lilju Alfreðsdóttur. Formaður stjórnarinnar er Gunnar Ólafur Haraldsson, hagfræðingur og fyrrum forstöðumaður Hagfræðistofnunar Háskóla Íslands. Hlutverk verkefnastjórnar er að skoða íslenska námslánakerfið í heild sinni og gera tillögur að umbótum þess og þróun. „Það fengur að fá þetta reynslumikla og öfluga fólk að borðinu til að endurskoða lögin um lánasjóðinn, þekking þeirra á málefnum sjóðsins mun nýtast vel í þessari mikilvægu vinnu sem framundan er,“ segir Lilja Alfreðsdóttir mennta- og menningarmálaráðherra.

Meðal álitaefna sem verkefnastjórnin mun taka til skoðunar eru hvers konar nám skuli vera lánshæft, hvernig vöxtum og endurgreiðslu skuli háttað hjá sjóðnum og fjármögnun hans. Einnig hvort tilefni sé til að ívilna ákveðnum námsgreinum þegar kemur að endurgreiðslu lána, þá meðal annars með tilliti til búsetu.

Aðrir í verkefnastjórninni eru Agnes Guðjónsdóttir, lögfræðingur og varaformaður, Davíð Freyr Jónsson, frumkvöðull og framkvæmdastjóri og Hrafnhildur Ásta Þorvaldsdóttir, framkvæmdastjóri Lánasjóðs íslenskra námsmanna (LÍN), öll tilnefnd af mennta- og menningarmálaráðherra. Aldís Mjöll Geirsdóttir formaður Landssamtaka íslenskra stúdenta og Ragnar Auðun Árnason stjórnarmaður í LÍN, bæði tilnefnd af LÍS og Andri Gunnarsson, lögmaður, tilnefndur af fjármála- og efnahagsráðuneytinu.








Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn