Hlutverk námsefnis og þróun þess til framtíðar
„Það var fróðlegt að heyra frá fagfólki úr svona ólíkum áttum. Við erum mörg að fást við sömu áskoranir þegar kemur að útgáfu og þróun námsefnis á tímum örra samfélags- og tæknibreytinga. En þar getum við líka lært mikið hvert af öðru. Við ræddum til að mynda um hvernig námsefni getur minnkað álag í starfi kennara, og stutt faglega þróun þeirra. Það er margt spennandi í þessum geira nú um stundir og mikilvægt að við fylgjumst vel með og aukum þekkingu okkar á þessu sviði,“ sagði Lilja Alfreðsdóttir mennta- og menningarmálaráðherra að ráðstefnunni lokinni.
Á ráðstefnunni voru kynntar ýmsar rannsóknarniðurstöður, meðal annars um mikilvægi samræmis milli námskrárgerðar, námsefnisgerðar og matsaðferða og breytt hlutverk kennslubóka. Meðal ræðumanna voru Tim Oates CBE, yfirmaður matrannsókna og þróunar hjá Cambridge Assessment, Thomas McLeish, formaður menntanefndar The Royal Society og Willam (Bill) Schmidt, forstöðumaður menntastefnumiðstöðvar Michigan háskóla.
Þá ræddi Lilja Alfreðsdóttir mennta og menningarmálaráðherra við Nick Gibb, ráðherra gæðamála í skólastarfi í Bretlandi, um sameiginlegar áskoranir sem löndin standa frammi fyrir í menntamálum.