Forsætisráðherra tók við lotukerfi fjölbreytileikans
Katrín Jakobsdóttir, forsætisráðherra, tók þátt í upphafsathöfn árvekniátaks um fjölbreytileika í Safnahúsinu á alþjóðlegum degi Sameinuðu þjóðanna um menningarlegan fjölbreytileika.
Þar veitti hún viðtöku lotukerfi fjölbreytileikans sem Viðskiptaráð Íslands hefur unnið í samstarfi við fjölmarga aðila. Lotukerfinu er ætlað að minna á hvað fjölbreytileiki snýst um marga og hvetja til þess að íslenskt samfélag nýti sér styrkinn sem í honum felst, hvort heldur í atvinnulífi, menntakerfi eða hjá hinu opinbera.
Katrín Jakobsdóttir, forsætisráðherra:
„Þó að íslenskt samfélag sé orðið mun fjölbreyttara en það var áður eigum við samt langt í land. Fólk er alls konar og samfélag sem gerir ekki aðeins ráð fyrir margbreytileikanum heldur nýtir sér styrkinn sem í honum felst verður gott samfélag.“
Árverknimyndbönd voru einnig ræst á fundinum og barnakór Ísaksskóla tók lagið. Fundurinn var haldinn á vegum Viðskiptaráðs Íslands, í samstarfi við Festu - miðstöð um samfélagsábyrgð og Félag Sameinuðu þjóðanna á Íslandi.
Heimsmarkmiðin
