Hoppa yfir valmynd
27. janúar 2022 Umhverfis-٫ orku- og loftslagsráðuneytið

Vestnorrænt samstarf í loftslagsmálum verði eflt

Guðlaugur Þór Þórðarsson, umhverfis-, orku- og loftslagsráðherra ávarpaði málþing Vestnorræna ráðsins úr einangrun.  - mynd

Ástæða er til að styrkja samstarf Íslands, Grænlands og Færeyja í loftslagsmálum og hreinum orkuskiptum. Þetta kom fram í máli Guðlaugs Þórs Þórðarsonar umhverfis-, orku- og loftslagsráðherra á málþingi Vestnorræna ráðsins um loftslagsmál í gær. Guðlaugur Þór sagði ríkin búa um margt við svipaðar aðstæður og að þau geti lært margt af hverju öðru, á sviði vísinda, loftslagsaðgerða og viðskipta.

Ráðstefna Vestnorræna ráðsins um loftslagsmál og græn umskipti var haldin í netheimum í gær, en auk Guðlaugs Þórs tóku þátt í henni Kalistat Lund og Magnus Rasmussen, ráðherrar umhverfismála í Grænlandi og Færeyjum, auk vísindamanna, sérfræðinga og annarra fulltrúa frá löndunum þremur. Sérstök kynning var á Norðurslóðastarfi á Akureyri, sem er þar í miklum blóma.

Guðlaugur Þór benti á að löndin búi um margt við svipaða ógn hvað loftslagsbreytingar varðar, en að efnahagur og samfélag allra ríkjanna byggi á gæðum hafsins og því þurfi að bregðast við súrnun hafsins, breytingu á hafís og straumum og öðru sem hafi áhrif á lífríki sjávar. Þá búi löndin yfir gnægð af endurnýjanlegri orku, s.s. á sviði vinds, vatnsorku og sjávarstrauma, auk jarðhita á Íslandi. Þetta gefi vestnorrænu ríkjunum færi á að vera í fararbroddi varðandi hrein orkuskipti. Hann nefndi að Ísland hafi nýlega ákveðið að banna olíuleit í íslenskri lögsögu, en áður hafi Grænlendingar tekið slíkt skref.

Guðlaugur Þór hvatti til aukins samtals og samvinnu ríkjanna á sviði orku- og loftslagsmála, m.a. á vísindasviðinu en einnig séu tækifæri til að efla vestnorræna samvinnu og rödd innan þess ramma sem þegar sé til staðar í norrænni samvinnu og Norðurslóðamálum. Hann benti á að á Íslandi væri vilji til að efla samvinnu á flestum sviðum við nágrannanna  á Grænlandi og í Færeyjum og að í fyrra starfi sem utanríkisráðherra hefði hann beitt sér fyrir tillögum og aðgerðum í því skyni.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum