Forsætisráðherra ávarpaði viðburð jafnréttisnefndar Evrópuþingsins

Katrín Jakobsdóttir forsætisráðherra flutti lykilerindi á viðburði jafnréttisnefndar Evrópuþingsins í Brussel í morgun í tilefni af alþjóðlegum baráttudegi kvenna.

Í ávarpi sínu fór forsætisráðherra yfir sögu jafnréttis á Íslandi og hvernig kvennahreyfingin hefði byggt á samstöðu kvenna, þvert á flokka, kynslóðir og stéttir. Hún ræddi um mikilvægar kerfisbreytingar sem hafa stuðlað að jafnrétti - eins og fæðingarorlof sem skiptist jafnt mikli beggja foreldra, jafnlaunavottun og breytingar á þungunarrofslöggjöf til að styrkja sjálfsákvörðunarrétt kvenna.

„Þessar kerfisbreytingar hafa ekki komið af sjálfu sér heldur eru þær afrakstur baráttu sem  hefur skilað sér í pólitískri stefnumótun og raunverulegri viðhorfsbreytingu til jafnréttis,“ sagði Katrín Jakobsdóttir forsætisráðherra. 

Þá ræddi forsætisráðherra um hina svokölluðu þriðju vakt sem COVID-19 faraldurinn ýkti upp þar sem aukið álag af heimilisstörfum bitnaði meira á konum en körlum. Einnig fór forsætisráðherra yfir þær mótvægisaðgerðir stjórnvalda vegna COVID-19 sem sérstaklega var ætlað að stuðla að jafnrétti kynjanna. Að lokum gerði forsætisráðherra baráttuna gegn kynbundnu ofbeldi að sérstöku umtalsefni en þar væri mikið verk óunnið.

^{Katrín Jakobsdóttir forsætisráðherra og Elisabeth Moreno, jafnréttismálaráðherra Frakklands}

Forsætisráðherra átti einnig fund í morgun með Elisabeth Moreno, jafnréttismálaráðherra Frakklands. Þar ræddu ráðherrarnir um aðgerðir stjórnvalda á Íslandi gegn kynbundnu ofbeldi, jafnlaunavottun og þátttöku kvenna í atvinnulífi og stjórnmálum.

Fyrr í dag fundaði forsætisráðherra með Robertu Metsola, forseta Evrópuþingsins, þar sem umræðuefnið var hið grafalvarlega ástand í Úkraínu, jafnréttismál og aðgerðir íslenskra stjórnvalda á því sviði.

Þá fundaði forsætisráðherra með Alexander De Croo, forsætisráðherra Belgíu, og ræddu þau málefni Úkraínu og öryggismál í Evrópu, orkuskipti og jafnréttismál.

^{Katrín Jakobsdóttir forsætisráðherra og Roberta Moreno, forseti Evrópuþingsins}

^{Katrín Jakobsdóttir forsætisráðherra og Alexander De Croo, forsætisráðherra Belgíu}

Erindi forsætisráðherra á viðburði jafnréttisnefndar Evrópuþingsins í Brussel