Tryggir áfram þjónustu fyrir gerendur ofbeldis

Guðmundur Ingi Guðbrandsson, félags- og vinnumarkaðsráðherra, hefur framlengt samning við Heimilisfrið um sérhæfða sálfræðiþjónustu fyrir fólk sem beitt hefur maka sína ofbeldi. Mikil ásókn hefur verið í þjónustu Heimilisfriðar undanfarin ár og jókst hún enn frekar í heimsfaraldrinum. Þjónustunni er ætlað að draga úr líkum á frekari ofbeldishegðun með því að veita fólki aðstoð við að þróa leiðir til að takast á uppbyggilegan hátt á við ágreining og erfiðleika í samskiptum.

Heimilisfriður hefur um árabil sérhæft sig í meðferðum fyrir gerendur ofbeldis og er áhersla lögð á að fólk hafi sjálft frumkvæði að því að leita sér aðstoðar, viðurkenni ábyrgð og sé tilbúið til þess að breyta hegðun sinni. Á því eru þó undantekningar eða þegar barnaverndaryfirvöld, félagsþjónusta eða lögregla vísa málum til Heimilisfriðar. Einnig er boðið upp á makaviðtöl og hópmeðferðarviðtöl.

Guðmundur Ingi Guðbrandsson, félags- og vinnumarkaðsráðherra: „Starfsemi Heimilisfriðar er gríðarlega mikilvæg og það skiptir miklu máli að í boði sé aðgengileg þjónusta þar sem gerendur ofbeldis geta fengið faglega aðstoð við að vinna í sínum málum. Félags- og vinnumarkaðsráðuneytið hefur undanfarin ár verið með samning við Heimilisfrið um sálfræðiþjónustu þannig að hægt sé að tryggja að þessi mikilvæga þjónusta sé aðgengileg öllum sem vilja leita sér aðstoðar.“