Grænt skref í menningar- og viðskiptaráðuneytinu

Menningar- og viðskiptaráðuneytið fékk í gær viðurkenningu frá umhverfisstofnun fyrir að ná fyrsta Græna skrefinu. Menningar- og viðskiptaráðuneytið var stofnað 1. febrúar á síðasta ári. Ráðuneytið vinnur nú að innleiðingu næstu skrefa. Markmið Grænu skrefanna er að efla umhverfisstarf ríkisaðila.

Grænu skrefin eru aðgerðaáætlun í fimm hlutum sem gerir stofnunum kleift að draga úr neikvæðum umhverfisáhrifum af starfsemi sinni með markvissum hætti og efla umhverfisvitund starfsmanna. Hvert skref inniheldur á bilinu 20 til 40 aðgerðir sem stofnanir þurfa að uppfylla til þess að ná skrefinu.

Öll ráðuneyti og Umbra, þjónustumiðstöð Stjórnarráðsins, vinna að innleiðingu Grænna skrefa í ríkisrekstri en þau eru jafnframt hluti af loftslagsstefnu Stjórnarráðsins.

Hægt er að kynna sér hvað felst í hverju skrefi á vefsíðu Grænna skrefa.

Verkefnið Græn skref í ríkisrekstri á rætur sínar að rekja til stefnu ríkisins fyrir árin 2013 – 2016 um Vistvæn innkaup og grænan ríkisrekstur, en á þeim tíma kom fram skýr vilji hjá mörgum ríkisstofnunum að draga úr neikvæðum umhverfisáhrifum, innleiða Grænt bókhald og auka þekkingu starfsfólks á umhverfismálum.

Grænu skrefin eru uppfærð reglulega til að endurspegla áherslur stjórnvalda og nýjustu þekkingu. Einnig er reynt að taka mið af reynslu og ábendingum frá þátttakendum við uppfærslu skrefanna. Grænu skrefin eru fjármögnuð af umhverfis- og auðlindaráðuneytinu en umsjón og rekstur verkefnisins er í höndum Umhverfisstofnunar.