Doktorsnemi - Menntavísindasvið

Doktorsnemi á Menntavísindasviði - Reynsla kvenna af erlendum uppruna af ofbeldi á vinnustað og í nánum samböndum

Laus er til umsóknar staða fyrir doktorsnema á Menntavísindasviði. Um er að ræða vinnu við verkefnið Reynsla kvenna af erlendum uppruna af ofbeldi á vinnustað og í nánum samböndum (Immigrant women¿s experiences of EDV and IPV (IWEV): A baseline exploration). Doktorsverkefnið er styrkt af Rannsóknarsjóði Íslands til 3 ára. 

Helstu verkefni og ábyrgð
Nemandinn mun vinna undir leiðsögn dr. Brynju E. Halldórsdóttur, lektors, og dr. Jóns Ingvars Kjaran, dósent. Bæði starfa þau við Menntavísindasvið Háskóla íslands, deild Menntunar og margbreytileika. Meginmarkmið verkefnisins er að skoða reynsluheim kvenna af erlendum uppruna sem hafa upplifað ofbeldi í nánum samböndum og í vinnunni. Verkefnið mun hafa þrjú meginmarkmið: þekkingarfræðilegt, fræðilegt og hagnýtt. Markmiðin tengjast megin rannsóknarspurningum verkefnisins, sem fjalla m.a. um: vinnutengt ofbeldi, ofbeldi í nánum samböndum og hvernig fjölmiðlar fjalla um konur af erlendum uppruna. Blandaðar aðferðir verða notaðar við gagnaöflun, m.a. spurningakönnun á netinu, viðtöl við konur af erlendum uppruna og krítísk orðræðugreining á fjölmiðlaefni og úrskurðum dómsstóla. Skyldur doktorsnemans felast í gagnasöfnun, skráningu og greiningu gagna og fræðilegum skrifum ásamt leiðbeinendum og öðrum sem tengjast verkefninu. Einnig er gert ráð fyrir að doktorsnemi komi að öflun frekari styrkja vegna rannsóknarinnar. 

Hæfnikröfur
Umsækjendur þurfa að hafa meistarapróf á sviði hug-, félags-, eða menntavísinda. Jafnframt er æskilegt að viðkomandi hafi góðan kynjafræðilegan bakgrunn. Æskilegt er að nemendur hafi góð tök á ólíkum aðferðafræðilegum nálgunum, jafnt megindlegum sem eigindlegum, þar sem notaðar verða blandaðar aðferðir í verkefninu. Skilyrði er að nemandi sé fullfær um að skrifa, lesa og tjá sig á ensku. Umsækjendur sem hafa góð tök á eftirfarandi tungumálum eru sérstaklega hvattir til að sækja um: pólska, tagaolog eða tælenska. Jafnframt þarf umsækjandi að hafa góða samskiptahæfni og geta unnið sjálfstætt.

Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Vinsamlega skilið inn eftirfarandi gögnum með umsókninni: 
>> Greinargerð þar sem umsækjandi lýsir hvernig hann uppfyllir skilyrði umsóknarinnar, hvers vegna hann hefur áhuga á að vinna þetta verkefni og hugmyndir umsækjanda um sitt framlag til verkefnisins (hámark 2 síður) 
>> Ferilskrá (CV) 
>> Prófskírteini 
>> Nöfn tveggja meðmælenda (nafn, tengsl við umsækjenda, tölvupóstfang og símanúmer) 

Gert er ráð fyrir að umsækjandi geti hafið störf við verkefnið 15. ágúst 2019. 

Umsækjandinn sem verður fyrir valinu sækir, í samráði við væntanlegan leiðbeinanda, um inntöku í doktorsnám við Háskóla Íslands áður en formleg ákvörðun er tekin um ráðningu í verkefnið. Tekið er við umsóknum utan hefðbundins umsóknartímabils doktorsnáms og umsækjandanum verður leiðbeint í gegnum ferlið.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í allt að sex mánuði frá lokum umsóknarfrests. 

Við ráðningu í störf í Háskóla Íslands er tekið mið af jafnréttisáætlun skólans, sjá her: https://www.hi.is/node/303261#markmid2 

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands 

Á Menntavísindasviði fer fram rannsóknartengt starfsnám fyrir kennara á leik-, grunn- og framhaldsskólastigi, uppeldis- og menntunarfræðinga, íþrótta- og heilsufræðinga, tómstunda- og félagsmálafræðinga og þroskaþjálfa. Lögð er áhersla á rannsóknir og þróunarstarf sem unnið er í samstarfi við starfsvettvang. 

Háskóli Íslands er stærsta kennslu-, rannsókna- og vísindastofnun Íslands og er í hópi 300 bestu háskóla heims samkvæmt nýjum matslista Times Higher Education.

Starfshlutfall er 100%
Umsóknarfrestur er til og með 15.03.2019

Nánari upplýsingar veitir
Brynja Elísabeth Halldórsdóttir - [email protected] - 525 5326
Lára Rún Sigurvinsdóttir - [email protected] - 525 5905

Háskóli Íslands
Deild menntunar og margbreytileika
Stakkahlíð
105 Reykjavík

Smelltu hér til að sækja um starfið