Hoppa yfir valmynd
Kennsla og rannsóknir

Dósent í krabbameinslækningum og yfirlæknir á aðgerðasviði Landspítala

Dósent í krabbameinslækningum og yfirlæknir á aðgerðasviði Landspítala

Laust er til umsóknar 50% starf dósents í krabbameinslækningum á fræðasviði lyflækninga við Læknadeild Háskóla Íslands og starf yfirlæknis á aðgerðasviði Landspítala. Um er að ræða samhliða störf samkvæmt samstarfssamningi stofnanna og verður einn og sami umsækjandinn ráðinn í bæði störfin.

Dómnefnd sem skipuð er á grundvelli reglna nr. 569/2009 fyrir Háskóla Íslands og stöðunefnd sem skipuð er á grundvelli laga nr. 40/2007 um heilbrigðisþjónustu metur hvort umsækjendur uppfylli lágmarksskilyrði til þess gegna hvoru starfi fyrir sig.

Sameiginleg valnefnd Háskóla Íslands og Landspítala, sem starfar á grundvelli reglna nr. 385/2003, mun gera tillögu um það hvaða umsækjandi verður talinn hæfastur til að gegna þessum samhliða störfum, á grundvelli heildarmats á þeim sjónarmiðum sem liggja til grundvallar ráðningu í hvort starf fyrir sig.

Helstu verkefni og ábyrgð

  • Starfsmaður mun uppfylla kennsluskyldu sína innan fræðasviðsins, þ.m.t. klíníska kennslu á Landspítala.
  • Gegna hlutverki forstöðumanns krabbameinslækninga innan Læknadeildar.
  • Vinna að uppbyggingu og þróun krabbameinslækninga við Landspítala með áherslu á kennslu, rannsóknir og þróun klínískrar þjónustu í samráði við aðra yfirlækna, forstöðumann kjarna, framkvæmdastjóra sviðsins og framkvæmdastjóra lækninga.
  • Stuðla að þverfaglegri samvinnu og uppbyggingu vísinda- og rannsóknarstarfs í samstarfi við önnur fræðasvið en læknisfræði.
  • Stuðla að því að greining og meðferð sjúkdóma taki mið af gagnreyndri læknisfræði og hagkvæmni í rekstri.
  • Vinna að bættri öryggismenningu og öflugu gæðastarfi á Landspítala.
  • Starfsmaðurinn verður sameiginlegur starfsmaður Háskóla Íslands og Landspítala í fullu starfi en hefur ráðningarsamning við hvora stofnun fyrir sig þar sem nánar er fjallað um starfsskyldur og verkefni í samræmi við samstarfssamning Háskóla Íslands og Landspítala frá 3. desember 2012.
  • Ráðið verður í starf dósents til fimm ára, með möguleika á ótímabundinni ráðningu að þeim tíma liðnum sbr. 3. mgr. 31. gr. reglna fyrir Háskóla Íslands nr. 569/2009, en ráðning í starf yfirlæknis er ótímabundin. Í báðum ráðningarsamningum er tekið fram að forsenda ráðningar í hvort starf um sig sé ráðning í samhliða starf á hinni stofnuninni.
  • Við ráðningu verður miðað við, að sá er þessi samhliða störf hlýtur falli sem best að aðstæðum og þörfum Læknadeildar og aðgerðarsviðs Landspítala.

Hæfnikröfur

  • Umsækjendur skulu hafa lokið doktorsprófi á fræðasviðinu eða hafa þekkingu og reynslu í samræmi við alþjóðleg viðmið fyrir viðkomandi starfsheiti á fræðasviðinu, staðfest með áliti dómnefndar.
  • Sérfræðileyfi í krabbameinslækningum.
  • Veruleg rannsóknavirkni á fræðasviðinu, sjálfstæði og frumkvæði í rannsóknum.
  • Reynsla af háskólakennslu, fræðilegri og klíniskri.
  • Reynsla af leiðbeiningu til æðri háskólagráðu er æskileg.
  • Stjórnunarreynsla og reynsla af öflun styrkja til rannsóknarstarfa.
  • Jákvætt viðmót og framúrskarandi hæfni í mannlegum samskiptum.

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Um meðferð umsókna, mat á hæfi umsækjenda og ráðningu í störfin er farið eftir ákvæðum laga nr. 85/2008 um opinbera háskóla, reglna um Háskóla Íslands nr. 569/2009 og ákvæðum laga um heilbrigðisþjónustu nr. 40/2007, eftir því sem við á í hvoru starfi fyrir sig.

Gert er ráð fyrir að ofangreind samhliða störf verði veitt frá 1. maí 2021, enda verði þá lokið störfum þeirra nefnda sem um málið fjalla.

Umsækjendur skulu láta fylgja með umsókn sinni vottorð um námsferil sinn og störf, ritaskrá, skýrslu um vísindastörf og önnur störf sem þeir hafa unnið og rannsóknaráætlun ef til ráðningar kemur. Enn fremur er ætlast til þess að umsækjendur láti fylgja með umsagnir um kennslu- og stjórnunarstörf sín, eftir því sem við á. Ef ekki er unnt að skila fylgigögnum með umsókn á rafrænu formi skal skila þeim í þríriti til vísindasviðs Háskóla Íslands, Sæmundargötu 2, 101 Reykjavík.

Öllum umsækjendum verður svarað og þeim tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.

Reglur um ráðningar og málefni starfsmanna sem hafa starfsskyldur hjá Háskóla Íslands og Landspítala eru aðgengilegar á vefnum, sjá hér: http://www2.hi.is/Apps/WebObjects/HI.woa/swdocument/1003186/385.pdf

Nánari upplýsingar um starfið veita auk Engilberts Sigurðssonar, þær Hlíf Steingrímsdóttir, framkvæmdastjóri aðgerðasviðs Landspítala ([email protected] / 824-5286) og Vigdís Hallgrímsdóttir forstöðumaður krabbameinsþjónustu ([email protected] / 825-3502).

Við ráðningu í störf í Háskóla Íslands er tekið mið af jafnréttisáætlun skólans, sjá hér: https://www.hi.is/haskolinn/jafnrettisaaetlun#markmid2 og við ráðningu í störf á Landspítala er tekið mið af jafnréttisáætlun spítalans, sjá hér: https://www.landspitali.is/um-landspitala/stefna-og-starfsaaetlun/jafnrettisstefna-landspitala/

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands

Heilbrigðisvísindasvið er eitt af fimm fræðasviðum Háskóla Íslands. Innan sviðsins eru sex deildir; Hjúkrunarfræðideild, Lyfjafræðideild, Læknadeild, Matvæla- og næringarfræðideild, Sálfræðideild og Tannlæknadeild. Starfsmenn sviðsins eru um 300 og nemendur um 2200.

Háskóli Íslands er stærsta kennslu-, rannsókna- og vísindastofnun Íslands og eini skólinn hérlendis sem er á báðum virtustu matslistunum yfir bestu háskóla heims, Times Higher Education World University Rankings og Shanghai Ranking.

  • Vinnutímaskipulag: Dagvinna
  • Starfshlutfall: 50%
  • Starfssvið: Kennsla og rannsóknir
  • Stéttarfélag: Félag háskólakennara
  • Umsóknarfrestur er til: 14.12.2020

Nánari upplýsingar veitir

Engilbert Sigurðsson - [email protected] - 525 4879

Smelltu hér til að sækja um starfið

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira