Hoppa yfir valmynd
StjórnunarstörfHöfuðborgarsvæðið

Forstjóri Barna- og fjölskyldustofu

Forstjóri Barna- og fjölskyldustofu

Félagsmálaráðuneytið auglýsir laust til umsóknar embætti forstjóra Barna- og fjölskyldustofu sem tekur til starfa 1. janúar 2022. 

Félagsmálaráðuneytið leitar að framsæknum stjórnanda sem hefur þekkingu á málefnum barna og hæfni til að leiða innleiðingar- og breytingaferli. 

Helstu verkefni og ábyrgð

Barna- og fjölskyldustofu er ætlað að vinna að farsæld barna í samræmi við bestu þekkingu og reynslu hverju sinni. Stofnunin mun sinna verkefnum sem tengjast þjónustu við börn og fjölskyldur þeirra. Þar á meðal eru verkefni á sviði barnaverndar en við stofnun Barna- og fjölskyldustofu verður Barnaverndarstofa lögð niður. Barna- og fjölskyldustofa mun jafnframt gegna lykilhlutverki við samþættingu þjónustu í þágu farsældar barna og fara með tilgreind verkefni í þágu barna sem nánar er kveðið á um í lögum um félagsþjónustu sveitarfélaga, lögum um þjónustu við fatlað fólk með langvarandi stuðningsþarfir, lögum um Greiningar- og ráðgjafarstöð ríkisins og lögum um þjónustu- og þekkingarmiðstöð fyrir blinda, sjónskerta og einstaklinga með samþætta sjón- og heyrnarskerðingu.  

Barna- og fjölskyldustofu er ætlað að vera verkfærakista ríkisins vegna samþættrar þjónustu við börn og fjölskyldur. Í því felst meðal annars að vera stuðningur við sveitarfélög og ríkisstofnanir vegna þjónustu í þágu barna, með ráðgjöf, leiðbeiningum, fræðslu og þróun gagnreyndra aðferða og úrræða í þágu barna. Í því felst jafnframt að hafa yfirumsjón með úrræðum á vegum ríkisins, þar á meðal Stuðlum, Barnahúsi og öðrum meðferðarúrræðum og fóstri. Meðal verkefna Barna- og fjölskyldustofu verður yfirumsjón með upplýsingakerfum samþættingar þjónustu í þágu farsældar barna og gagnagrunni og stafrænum lausnum fyrir barnavernd á landsvísu.  

 

Hæfniskröfur

Leitað er að einstaklingi sem býr yfir:

  • Háskólagráðu sem nýtist í starfi.
  • Þekkingu og/eða reynslu af einum af eftirfarandi málaflokkum: Barnavernd, heilbrigðisþjónusta, fræðslumál eða velferðarþjónusta. Þekking og/eða reynsla af fleiri en einum þessara málaflokka er kostur.
  • Reynslu af stjórnun, rekstri og mannaforráðum.
  • Þekkingu á stefnumótun, áætlanagerð og breytingastjórnun.
  • Þekkingu á sviði opinberrar stjórnsýslu.
  • Mjög góðri hæfni í mannlegum samskiptum, þjónustumiðuðu hugarfari ásamt leiðtogahæfileikum.
  • Frumkvæði og sjálfstæði í vinnubrögðum.
  • Metnaði og vilja til að ná árangri.
  • Góðri tungumálakunnáttu í ræðu og riti (íslensku og ensku, Norðurlandamál er kostur).

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Félags- og barnamálaráðherra skipar í embættið til fimm ára í senn. Engan má skipa oftar en tvisvar sinnum í embættið. Þriggja manna hæfnisnefnd skipuð af félags- og barnamálaráðherra, metur hæfni umsækjenda og lætur ráðherra í té skriflega rökstudda umsögn um hæfni þeirra. 

Umsóknarfrestur er til og með 23. september nk. Umsókninni skal fylgja starfsferilskrá ásamt fylgigögnum um menntun og árangur í starfi og kynningarbréfi þar sem tilgreind er ástæða umsóknar. Umsóknir gilda í sex mánuði frá því að umsóknarfrestur rennur út, sbr. reglur um auglýsingar lausra starfa nr. 1000/2019. Fólk af öllum kynjum er hvatt til að sækja um. Öllum umsóknum verður svarað þegar ákvörðun um ráðningu liggur fyrir.

Starfshlutfall er 100%

Umsóknarfrestur er til og með 23.09.2021

Nánari upplýsingar veitir

Gissur Pétursson - [email protected] - 545-8100

Smelltu hér til að sækja um starfið

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira