Hoppa yfir valmynd
/

Embætti sóknarprests í Hofprestakalli - Biskupsstofa - Vopnafjörður - 201707/1220

 


Biskup Íslands auglýsir laust til umsóknar embætti sóknarprests í Hofsprestakalli, Austurlandsprófastsdæmi. Skipað er í embættið frá 15. október 2017 til fimm ára. 
Um val á umsækjendum er vísað til starfsreglna kirkjuþings um val og veitingu prestsembætta nr. 144/2016 og um presta nr. 1011/2011, svo og leiðbeinandi reglna biskups Íslands frá 2017 fyrir umsækjendur um laus prestsembætti. Með því að sækja um embættið staðfesta umsækjendur að þeir hafi átt þess kost að kynna sér þessar reglur. Starfsreglur þessar eru á vef kirkjunnar www.kirkjan.is

Í Hofsprestakalli eru þrjár sóknir, Hofssókn, með 136 íbúa og eina kirkju, Hofskirkju, Skeggjastaðasókn, með 107 íbúa og eina kirkju, Skeggjastaðakirkju og Vopnafjarðarsókn, með 511 íbúa og eina kirkju, Vopnafjarðarkirkju, ásamt safnaðarheimili. Safnaðaraðstaða Skeggjastaðasóknar er á Skeggjastöðum. Hofsprestakall er á samstarfssvæði með sóknum Egilsstaðaprestakalls. Skeggjastaðasókn er þó á samstarfssvæði með sóknum Langanesprestakalls, Eyjafjarðar- og Þingeyjarprófastsdæmi. 
Vísað er til þarfagreiningar sókna prestakallsins varðandi frekari upplýsingar um starfið og starfsumhverfið. Auglýsing þessi og þarfagreining er birt á vef kirkjunnar undir laus störf. Þá er bent á vef Hofsprestakalls: www.kirkjan.is/hofsprestakall   

Embættinu fylgja sérstakar starfsskyldur, allt að 50% starfshlutfall, við prófastsdæmið, Biskupsstofu, eða annan kirkjulegan aðila. Verða þessar skyldur skilgreindar nánar í erindisbréfi. 

Prestssetursjörðin Hof í Vopnafirði fylgir embættinu, að undanskildum veiðihlunnindum jarðarinnar og þar er skrifstofa sóknarprests. Sóknarpresti er skylt að sitja prestssetrið og hafa umsjón með því. Fyrir liggur haldsbréf ásamt framkvæmdaáætlun hjá fasteignasviði Biskupsstofu. Sá sem skipaður er til embættisins undirritar haldsbréf áður en tekið er við prestssetrinu. Um prestssetrið gilda starfsreglur um prestssetur og aðrar fasteignir þjóðkirkjunnar nr. 950/2009. 

Allar gildar umsóknir fara til þriggja manna matsnefndar sem metur hæfni umsækjenda, sbr. 5. og 6. gr. framangreindra starfsreglna um val og veitingu prestsembætta. Matsnefnd velur að jafnaði fjóra hæfustu umsækjendurna en þó aldrei fleiri en fimm og skilar skýrslu þar að lútandi til biskups. 
Kjörnefnd prestakalls kýs prest úr hópi framangreindra umsækjenda, að loknu valferli kjörnefndar, sbr. fyrrgreindar starfsreglur um val og veitingu prestsembætta.  
Umsækjendur geri skriflega grein fyrir starfsferli, samskiptahæfileikum og öðru því sem þeir óska eftir að taka fram. Umsókn skal fylgja staðfest afrit af prófskírteini ásamt einkunnum svo og upplýsingar um starfsþjálfun eftir því sem við á. Einnig skal fylgja staðfesting á annarri menntun og þjálfun eftir atvikum. 

Umsækjendum ber að skila greinargerð, að hámarki 500 orð, um framtíðarsýn og væntingar er varða embættið. 

Umsækjendum ber að fylla út eyðublað þar sem biskupi er heimilaður aðgangur að tilteknum upplýsingum úr sakaskrá um viðkomandi umsækjanda, sbr. 3. gr. starfsreglnanna. Skal undirrituð heimild þar um fylgja umsókninni. Eyðublaðið má finna á vef kirkjunnar www.kirkjan.is 

Heimilt er að óska eftir því að almennar prestskosningar fari fram samkvæmt 15. gr. framangreindra starfsreglna um val og veitingu prestsembætta. Skrifleg ósk um kosningu skal hafa borist biskupi eigi síðar en hálfum mánuði eftir að prestakallið var auglýst laust til umsóknar. 
Um embættið gilda lög um stöðu, stjórn og starfshætti þjóðkirkjunnar nr. 78/1997, lög um réttindi og skyldur starfsmanna ríkisins nr. 70/1996, starfsreglur er kirkjuþing setur og samþykktir um innri málefni kirkjunnar. Er einkum vísað til starfsreglna um presta. 
Um laun og önnur kjör fer samkvæmt ákvörðun kjararáðs. 
Nánari upplýsingar um embættið, starfskjör og helstu lög og reglur sem um starfið gilda eru veittar á Biskupsstofu, s. 5284000, hjá settum sóknarpresti Hofsprestakalls, sr. Brynhildi Óladóttur, s. 8647525 og prófasti Austurlandsprófastsdæmis, sr. Davíð Baldurssyni, s. 4761740. 

Umsóknarfrestur um embættið er til miðnættis miðvikudaginn 23. ágúst 2017. 
Sækja ber um embættið rafrænt á vef kirkjunnar og leggja fram tilskilin fylgigögn á rafrænu formi ásamt öðrum þeim gögnum er umsækjandi kann að vilja leggja fram. 
Vísað er til laga um jafna stöðu og jafnan rétt kvenna og karla nr. 10/2008. 
Vakin er athygli á því að nöfn umsækjenda um embættið verða birt á vef kirkjunnar www.kirkjan.is að liðnum umsóknarfresti  

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira