Skólameistari Fjölbrautarskólans við Ármúla - Mennta- og menningarmálaráðuneytið - Reykjavík - 201804/776

  

 



Embætti skólameistara Fjölbrautaskólans við Ármúla laust til umsóknar

Fjölbrautaskólinn við Ármúla er opinber framhaldsskóli sem var stofnaður 1981. Í skólanum er boðið upp á dagskólanám á bóknámsbrautum, heilbrigðisbrautum, almennri námsbraut og sérnámsbrautum. Starfsmenn skólans eru um 110 og fjöldi nemenda í dagskóla eru um 900 og álíka margir í fjarnámi. 

Hæfnikröfur
Leitað er eftir einstaklingi með umfangsmikla stjórnunarreynslu, leiðtoga- og samskiptahæfni, reynslu af stefnumótunarvinnu, hæfileika til nýsköpunar og að stýra breytingum. Þekking og reynsla af stjórnsýslu, fjármálum og rekstri er einnig mikilvæg.  

Menntunarkröfur
Samkvæmt 14. gr. laga um menntun og ráðningu kennara og skólastjórnenda við leikskóla, grunnskóla og framhaldsskóla, nr. 87/2008, skal skólameistari hafa starfsheitið framhaldsskólakennari og viðbótarmenntun í stjórnun og kennslureynslu á framhaldsskólastigi.

Starfssvið 
Skólameistari gegnir mikilvægu hlutverki í mótun skólastarfs á grundvelli laga og aðalnámskrár framhaldsskóla og mikilvægt að umsækjendur hafi skýra framtíðarsýn hvað þetta varðar. Skólameistari veitir skólanum forstöðu. Hann stjórnar daglegum rekstri og starfi skólans og gætir þess að skólastarfið sé í samræmi við lög, reglugerðir, aðalnámskrá og önnur gildandi fyrirmæli á hverjum tíma. Hann ber ábyrgð á gerð fjárhagsáætlunar og að henni sé fylgt og hefur frumkvæði að gerð skólanámskrár og umbótastarfi innan skólans.

Ráðning og kjör
Mennta- og menningarmálaráðherra skipar skólameistara til fimm ára í senn að fenginni umsögn hlutaðeigandi skólanefndar skv. 6. gr. laga um framhaldsskóla, nr. 92/2008, sbr. lög um réttindi og skyldur starfsmanna ríkisins, nr. 70/1996, með síðari breytingum. Ráðið er í starfið frá 1. ágúst 2018.

Um laun skólameistara fer eftir 39. gr. a í lögum um réttindi og skyldur starfsmanna ríkisins, nr. 70/1996.

Umsóknir
Umsóknir með greinargerð umsækjenda um framtíðarsýn fyrir Fjölbrautaskólann við Ármúla (út frá faglegum og rekstrarlegum áherslum í skólastarfi) með upplýsingum um núverandi starfsheiti umsækjenda ásamt ítarlegum upplýsingum um menntun og fyrri störf skulu hafa borist mennta- og menningarmálaráðuneytinu, Sölvhólsgötu 4, 150 Reykjavík eða á netfangið [email protected], fyrir kl. 16:00, mánudaginn 30. apríl 2018. 

Nöfn allra umsækjenda verða birt á vef ráðuneytisins að loknum umsóknarfresti og verða umsóknir þar sem óskað er nafnleyndar ekki teknar til greina. Nánari upplýsingar um starfið veitir Jens Pétur Hjaltested rekstrarstjóri í mennta- og menningarmálaráðuneyti.

Umsóknarfrestur er til og með 30. apríl 2018.



Mennta- og menningarmálaráðuneyti, 13. apríl 2018.

 

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn