Doktorsnemi í efnafræði - Háskóli Íslands, Verkfræði- og náttúruvísindasvið - Reykjavík - 201805/974

 

Doktorsnemi í efnafræði - Háskóli Íslands

Laus er til umsóknar staða doktorsnema í efnafræði við Verkfræði- og náttúruvísindasvið, Háskóla Íslands. Leiðbeinandi er Snorri Þór Sigurðsson, prófessor við Raunvísindadeild Háskóla Íslands.

Verkefnið: Stöðugar stakeindir fyrir lífeðlisfræðilegar rannsóknir
Stöðugar stakeindir nýtast á mörgum sviðum, allt frá fjölliðuefnafræði að litrófsgreiningum. Við höfum viðamikla reynslu af því að smíða stakeindir sem merki fyrir rafeindasegulspunalitrófsgreiningu (e. electron paramagnetic resonance spectroscopy) og innleiða þær á ákveðna staði í bæði DNA og RNA. Að undanförnu höfum við einnig smíðað stakeindapör í því augnamiði að auka næmni kjarnsegullitrófsgreininga (nuclear magnetic resonance spectroscopy) með mögnun á kjarnaskautun (e. dynamic nuclear polarization, DNP). Markmið verkefnisins er að smíða nýjar stakeindir til notkunar í lífeðlisfræðilegum rannsóknum, sem unnar eru í samstarfi við rannsóknahópa í Evrópu og í Bandaríkjunum. Nánar tiltekið verða kolefnisstakeindir notaðar við smíðar á stakeindapörum fyrir DNP.  

Hæfniskröfur
Við leitum að áhugasömum doktorsnema til að smíða og greina stakeindir og stakeindapör. Umsækjendur skulu hafa meistaragráðu í lífrænni efnafræði og helst reynslu í fjölskrefa efnasmíðum. Hæfileikar sem nýtast vel í þessu námi eru frumkvæði og metnaður, auk hæfni til að vinna bæði sjálfstætt og í teymi. Umsækjendur skulu hafa mjög góða enskukunnáttu, bæði í skrifuðu og töluðu máli.

Rannsóknarhópurinn 
Rannsóknahópurinn hefur aðstöðu á Raunvísindastofnun Háskólans. Nánari upplýsingar um rannsóknahópinn er að finna á vefsíðu okkar (https://notendur.hi.is/~snorrisi/).

Umsóknarfrestur og upphaf námsins
Umsóknarfrestur er til og með 28. maí 2018.

Vinna við verkefnið hefst 25. ágúst 2018. 

Umsóknin

Sótt er um starfið á heimasíðu Háskóla Íslands undir laus störf.

Umsókninni skal fylgja i) kynnisbréf, ii) ferilskrá, iii) afrit af prófskírteinum (grunnnám og meistaranám), iv) TOEFL einkunn. Umsækjendur skulu óska eftir að send verði tvö umsagnarbréf beint frá umsagnaraðilum á [email protected] (Nafn umsækjanda skal tilgreint í efnislínu). 

Nánari upplýsingar
Verkefnið er styrkt til þriggja ára af Rannsóknarsjóði Háskóla Íslands. Ráðning er háð því að nemandinn sæki formlega um doktorsnám við deildina og verði samþykktur inn í það stundi hann ekki doktorsnám nú þegar.  

Laun eru samkvæmt kjarasamningi fjármálaráðherra og Félags háskólakennara.  

Nánari upplýsingar veitir Snorri Þór Sigurðsson prófessor ([email protected]).

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í allt að sex mánuði frá lokum umsóknarfrests.

Við ráðningu í störf í Háskóla Íslands er tekið mið af jafnréttisáætlun skólans

Vakin er athygli á málstefnu Háskóla Íslands.

Á Verkfræði- og náttúruvísindasviði starfa 360 manns við rannsóknir og kennslu á sviði verkfræði og náttúruvísinda. Starfsumhverfið er alþjóðlegt enda eykst sífellt hlutfall erlendra starfsmanna og nemenda við sviðið, en fjórðungur bæði starfsmanna og framhaldsnema eru erlendir. Nemendur Verkfræði- og náttúruvísindasviðs eru um 2300 talsins í sex deildum. Þar af eru 350 í meistaranámi og 150 í doktorsnámi.  Rannsóknarstofnanir sviðsins eru Jarðvísindastofnun og Eðlisvísindastofnun sem tilheyra báðar Raunvísindastofnun, Líf- og umhverfisvísindastofnun, Verkfræðistofnun og Stofnun Sæmundar fróða sem er þverfræðileg stofnun og heyrir undir öll fræðasvið háskólans. 
Háskóli Íslands er stærsta kennslu-, rannsókna- og vísindastofnun Íslands og er í hópi 250 bestu háskóla heims samkvæmt nýjum matslista Times Higher Education.

 

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn