Hoppa yfir valmynd
Kennsla og rannsóknirHöfuðborgarsvæðið201811/2140Háskóli Íslands - Landspítali

Prófessor í svæfinga- og gjörgæslulækningum og yfirlæknir á aðgerðasviði

Prófessor í svæfinga- og gjörgæslulækningum - Háskóli Íslands - og yfirlæknir á aðgerðasviði - Landspítali - Reykjavík

Laust er til umsóknar starf prófessors á fræðasviði svæfinga- og gjörgæslulækninga við Læknadeild Háskóla Íslands og starf yfirlæknis á aðgerðasviði Landspítala, en um er að ræða samhliða störf samkvæmt samstarfssamningi stofnanna og verður einn og sami umsækjandinn ráðinn í bæði störfin.

Dómnefnd sem skipuð er á grundvelli reglna nr. 569/2009 fyrir Háskóla Íslands og stöðunefnd sem skipuð er á grundvelli laga nr. 40/2007 um heilbrigðisþjónustu metur hvort umsækjendur uppfylli lágmarksskilyrði til þess að gegna hvoru starfi fyrir sig. 

Sameiginleg valnefnd Háskóla Íslands og Landspítala, sem starfar á grundvelli reglna nr. 385/2003, mun gera tillögu um það hvaða umsækjandi verður talinn hæfastur til að gegna þessum samhliða störfum, á grundvelli heildarmats á þeim sjónarmiðum sem liggja til grundvallar ráðningu í hvort starf fyrir sig.

Menntunar- og hæfniskröfur:
Doktorspróf eða próf sem jafnað verður til doktorsprófs, eða jafngild hæfni að mati dómnefndar. 
Sérfræðileyfi í svæfinga- og gjörgæslulækningum á Íslandi. 
Veruleg rannsóknavirkni á fræðasviðinu, sjálfstæði og frumkvæði í rannsóknum. 
Reynsla af háskólakennslu, fræðilegri og klínískri og leiðbeiningu til æðri háskólagráðu. 
Stjórnunarreynsla.
Reynsla af öflun styrkja til rannsóknarstarfa. 
Jákvætt viðmót og framúrskarandi hæfni í mannlegum samskiptum.

Starfsskyldur: 
Uppfylla kennsluskyldu sína innan fræðasviðsins, þ.m.t. klíníska kennslu á Landspítala.
Gegna starfi forstöðumanns fræðasviðs svæfinga- og gjörgæslulækninga innan Læknadeildar samkvæmt skipan deildarráðs. 
Vinna að uppbyggingu og þróun svæfinga- og gjörgæslulækninga við Landspítala, bæði í Fossvogi og á Hringbraut með áherslu á kennslu, rannsóknir og þróun klínískrar þjónustu í samráði við aðra yfirlækna, framkvæmdastjóra sviðsins og framkvæmdastjóra lækninga.
Stuðla að þverfaglegri samvinnu og uppbyggingu vísinda- og rannsóknarstarfs í samstarfi við önnur fræðasvið en læknisfræði.
Stuðla að því að greining og meðferð sjúkdóma taki mið af gagnreyndri læknisfræði og hagkvæmni í rekstri.
Vinna að bættri öryggismenningu og öflugu gæðastarfi á Landspítala. 

Sá sem ráðinn verður er sameiginlegur starfsmaður Háskóla Íslands og Landspítala í fullu starfi en hefur ráðningarsamning við hvora stofnun fyrir sig þar sem nánar er fjallað um starfsskyldur og verkefni í samræmi við samstarfssamning Háskóla Íslands og Landspítala frá 3. desember 2012. Ráðið verður í starf prófessors til fimm ára, með möguleika á ótímabundinni ráðningu að þeim tíma liðnum sbr. 3. mgr. 31. gr. reglna fyrir Háskóla Íslands nr. 569/2009, en ráðning í starf yfirlæknis er tímabundin til 5 ára í senn sbr. 9.gr. laga nr. 40/2007 og stefnu Landspítala í ráðningum stjórnenda. Í báðum ráðningarsamningum er tekið fram að forsenda ráðningar í hvort starf um sig sé ráðning í samhliða starf á hinni stofnuninni. 

Laun í starfi prófessors eru samkvæmt kjarasamningi fjármálaráðherra f.h. ríkissjóðs við Félag prófessora en laun í starfi yfirlæknis eru samkvæmt kjarasamningi fjármálaráðherra f.h. ríkissjóðs og Læknafélags Íslands.

Við ráðningu verður miðað við, að sá er þessi samhliða störf hlýtur falli sem best að aðstæðum og þörfum Læknadeildar og aðgerðarsviðs Landspítala.

Um meðferð umsókna, mat á hæfi umsækjenda og ráðningu í störfin er farið eftir ákvæðum laga nr. 85/2008 um opinbera háskóla, reglna um Háskóla Íslands nr. 569/2009 og ákvæðum laga um heilbrigðisþjónustu nr. 40/2007, eftir því sem við á í hvoru starfi fyrir sig.

Umsóknarferli

Umsóknarfrestur er til og með 2. janúar 2019.

Gert er ráð fyrir að ofangreind samhliða störf verði veitt frá 1. febrúar 2019, enda verði þá lokið störfum þeirra nefnda sem um málið fjalla. 

Sótt er um starfið á vefsíðu Háskóla Íslands undir laus störf. 

Umsækjendur skulu láta fylgja með umsókn sinni vottorð um námsferil sinn og störf, ritaskrá, skýrslu um vísindastörf og önnur störf sem þeir hafa unnið og rannsóknaráætlun ef til ráðningar kemur. Enn fremur er ætlast til þess að umsækjendur láti fylgja með umsagnir um kennslu- og stjórnunarstörf sín, eftir því sem við á. Ef ekki er unnt að skila fylgigögnum með umsókn á rafrænu formi skal skila þeim í þríriti til vísindasviðs Háskóla Íslands, Sæmundargötu 2, 101 Reykjavík.

Öllum umsækjendum verður svarað og þeim tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.

Reglur um ráðningar og málefni starfsmanna sem hafa starfsskyldur hjá Háskóla Íslands og Landspítala eru aðgengilegar á vefnum, sjá hér:  http://www2.hi.is/Apps/WebObjects/HI.woa/swdocument/1003186/385.pdf

Nánari upplýsingar um starfið veita Engilbert Sigurðsson, forseti Læknadeildar Háskóla Íslands ([email protected] / 525 4879) og Vigdís Hallgrímsdóttir, framkvæmdastjóri aðgerðasviðs Landspítala ([email protected] / 825-3502).

Við ráðningu í störf í Háskóla Íslands er tekið mið af jafnréttisáætlun skólans og við ráðningu í störf á Landspítala er tekið mið af jafnréttisáætlun spítalans

Vakin er athygli á málstefnu Háskóla Íslands

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira