Hoppa yfir valmynd
Kennsla og rannsóknirHöfuðborgarsvæðið201904/849Háskóli Íslands

Doktorsnemi í jarðskjálftaverkfræði - Verkfræði- og náttúruvísindasvið

Doktorsnemi í jarðskjálftaverkfræði, Verkfræði- og náttúruvísindasvið, Háskóli Íslands 

Auglýst er eftir doktorsnema við Háskóla Íslands. Leitast er eftir að ráða metnaðarfullan og vinnusaman doktorsnema til þess að sinna grunnrannsóknum sem tengjast jarðskjálftaverkfræði, jarðskjálftafræði, tæknilegrar jarðskjálftafræði (e. engineering seismology) og mati á hættu af völdum jarðskjálfta. Rannsóknirnar munu fara fram við umhverfis- og byggingarverkfræðideild, og rannsóknarmiðstöð í jarðskjálftaverkfræði, á Verkfræði- og náttúruvísindasviði Háskóla Íslands. Doktorsneminn mun vinna náið með nýdoktor við rannsóknarverkefni sem hlotið hefur styrk frá Rannsóknamiðstöð Íslands fyrir 2019-2022.

Helstu verkefni og ábyrgð
Verkefnislýsing
Doktorsneminn mun stunda grunnrannsóknir innan þriggja ára rannsóknarverkefnis sem fjallar um ýmsar hliðar jarðskjálftahættumats á Íslandi. Sér í lagi verður lögð áhersla á að kanna áreiðanleika slíks mats, endurbæta þau líkön sem liggja til grundvallar og þróa ný, meðhöndla óvissu og meta næmni matsins fyrir upphafsforsendum. Þannig verður líkindafræðilegt mat á jarðskjálftahættu rannsakað með tilliti til þeirra grunnstika og líkana sem liggja til grundvallar og fylgir jafnan mikil óvissa um. Óvissa og meðferð hennar í líkangerðinni verður ákvörðuð t.d. fyrir upptökum og eiginleikum jarðskjálftanna sjálfra, staðsetningu jarðskjálftasprungna og virkni þeirra, líkön af dvínun útslags yfirborðshreyfinga í jarðskjálftum sem fall af skjálftastærð, fjarlægð og staðbundnum áhrifum yfirborðslaga. Jarðskjálftahætta og megindlegt mat á óvissu hennar verður sett fram.

Doktorsneminn mun vinna náið með nýdoktor sem starfar við verkefnið og verður hluti af alþjóðlegu og fjölfaglegu teymi sérfræðinga á ofangreindum sviðum við Háskóla Íslands, Háskólann í Reykjavík, Veðurstofu Íslands, German Research Centre for Geosciences, Þýskalandi, University of Memphis og Virginia Tech, Bandaríkjunum, University of Patras, Grikklandi, Norwegian Geotechnical Institute, Noregi, og King Abdullah University of science and technology, Saudi Arabíu.

Verkefnisstjóri er Dr. Benedikt Halldórsson, rannsóknarprófessor við umhverfis- og byggingarverkfræðideild, og forstöðumaður rannsókna við rannsóknarmiðstöð í jarðskjálftaverkfræði. Hann er einnig sérfræðingur í tæknilegri jarðskjálftafræði við Veðurstofu Íslands. Doktorsneminn mun njóta leiðsagnar Benedikts og vinna náið með honum og nýdoktor, og munu samstarfsmenn úr ofangreindum stofnunum mynda doktorsnefndina. Doktorsneminn mun því ganga inn í virkan og samrýmdan rannsóknarhóp sem samanstendur af nýdokturum sem ásamt samstarfsaðilum eru virkir í innlendu og alþjóðlegu samstarfi og rannsóknarverkefnum s.s. H2020 Evrópuverkefnum. 

Hæfnikröfur
>> Meistaragráða í byggingarverkfræði eða jarðeðlisfræði, þá sérstaklega á sviði jarðskjálftaverkfræði, jarðskjálftafræði, sveiflufræði mannvirkja og/eða jarðefna, tímaraðagreiningu
>> Góð kunnátta á forritun
>> Góð enskukunnátta í töluðu og rituðu máli
>> Góð hæfni í mannlegum samskiptum
>> Umsækjandi þarf að geta unnið sjálfstætt og eiga gott með að vinna í teymi
>> Reynsla af rannsóknum á jarðskjálftum, hættumati og/eða dvínunarlíkingum jarðskjálftahreyfinga er kostur

Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.
Verkefnið er til þriggja ára og hefst í lok ágúst 2019, eða eftir samkomulagi. Vinna doktorsnema við verkefnið verður uppistaða doktorsritgerðarinnar. Starfsaðstaða er við umhverfis- og byggingarverkfræðideild Háskóla Íslands, og við Rannsóknarmiðstöð í jarðskjálftaverkfræði. 

Umsókn skal fela í sér greinargerð um áhuga umsækjanda á verkefninu, hvaða hluti þess vekur mestan áhuga og hvað hann eða hún telur sig hafa fram að færa við mótun og vinnslu verkefnisins. Greinargerðin skal ekki vera lengri en 2 blaðsíður. Til viðbótar skal fylgja: i) ferilskrá, ii) afrit af prófskírteinum (grunnnám og meistarapróf), iii) staðfest afrit af námsárangri í námskeiðum, iv) afrit af meistaraprófsritgerð eða annarri viðamikilli rannsóknarritgerð (PDF), og v) nöfn tveggja umsagnaraðila og upplýsingar um hvernig má hafa samband við þá (nafn, staða, stofnun, netfang og símanúmer, og samband umsækjanda við umsagnaraðila).
Í framhaldi af ákvörðun um ráðningu þarf að sækja formlega um doktorsnám í Háskóla Íslands, við Umhverfis- og byggingarverkfræðideild, Verkfræði- og náttúruvísindasvið. 

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.

Við ráðningu í störf í Háskóla Íslands er tekið mið af jafnréttisáætlun skólans, sjá hér: http://www.hi.is/haskolinn/jafnrettisaaetlun#markmid2.

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands.

Á Verkfræði- og náttúruvísindasviði starfa 360 manns við rannsóknir og kennslu á sviði verkfræði og náttúruvísinda. Starfsumhverfið er alþjóðlegt enda eykst sífellt hlutfall erlendra starfsmanna og nemenda við sviðið, en fjórðungur bæði starfsmanna og framhaldsnema eru erlendir. Nemendur Verkfræði- og náttúruvísindasviðs eru um 2300 talsins í sex deildum. Þar af eru 350 í meistaranámi og 150 í doktorsnámi. Rannsóknarstofnanir sviðsins eru Jarðvísindastofnun og Eðlisvísindastofnun sem tilheyra báðar Raunvísindastofnun, Líf- og umhverfisvísindastofnun, Verkfræðistofnun og Stofnun Sæmundar fróða sem er þverfræðileg stofnun og heyrir undir öll fræðasvið háskólans. 

Háskóli Íslands er stærsta kennslu-, rannsókna- og vísindastofnun Íslands og er í hópi 250 bestu háskóla heims samkvæmt nýjum matslista Times Higher Education.

Starfshlutfall er 100%
Umsóknarfrestur er til og með 13.05.2019

Nánari upplýsingar veitir
Benedikt Halldórsson - [email protected] - 525 4132


Háskóli Íslands
Umhverfis- og byggingarverkfræði, rannsóknir
Hjarðarhaga 2-6
101 Reykjavík


Smelltu hér til að sækja um starfið
 

 

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira