Hoppa yfir valmynd
Kennsla og rannsóknirHöfuðborgarsvæðið201911/1892Háskóli Íslands

Lektor í félagsráðgjöf - Félagsvísindasvið

Lektor í félagsráðgjöf, Félagsvísindasvið Háskóla Íslands

Félagsráðgjafardeild Háskóla Íslands auglýsir laust til umsóknar fullt starf lektors á sviði velferðarrannsókna, með áherslu á árangursmælingar, fátæktarrannsóknir, rannsóknir á lífsgæðum og megindlegar rannsóknaraðferðir.

Helstu verkefni og ábyrgð
Lektornum er ætlað að sinna kennslu í grunn, meistara og- doktorsnámi á sviði velferðarrannsókna, jafnt kenninga sem aðferða, með áherslu á rannsóknir á fátækt og lífsgæðum. Lektornum verður einnig falin kennsla í námskeiðum á sviði félagsráðgjafar. Áhersla er lögð á að lektorinn taki þátt í rannsóknarverkefnum í samstarfi við kennara deildar á sérsviðum þeirra. Leitað er að einstaklingi sem hefur áhuga á að helga sig akademísku starfi og framþróun rannsókna og rannsóknaraðferða á sviði félagsráðgjafar.

Hæfnikröfur
>>Umsækjandi skal hafa lokið doktorsnámi á sviði velferðarrannsókna eða sambærilegum sviðum
>>Þekking á kenningum og aðferðum velferðarrannsókna með áherslu á árangursmælingar og mælingar á fátækt og lífsgæðum. 
>>Gott vald á megindlegum rannsóknaraðferðum. 
>>Hafa stundað rannsóknir á íslensku velferðarkerfi. 
>>Reynsla af fjölþjóðlegu rannsóknarsamstarfi og samanburðarrannsóknum á fræðasviðinu.
>>Þekking á aþjóðlegum gagnasöfnum á fræðasviðinu er kostur. 
>>Hæfni í mannlegum samskiptum, áreiðanleiki, frumkvæði og sjálfstæði í vinnubrögðum eru nauðsynleg ásamt góðri hæfni til að miðla þekkingu 

Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.
Við ráðningu verður horft til þess að hæfni umsækjanda falli sem best að aðstæðum og þörfum Félagsráðgjafardeildar og Félagsvísindasviðs. 

Ráðið verður í starfið til fimm ára með möguleika á ótímabundinni ráðningu að þeim tíma liðnum, sbr. 3. mgr. 31. gr. reglna fyrir Háskóla Íslands nr. 569/2009. Miðað er við að ráðið verði í starfið frá 1. júlí 2020, þó ekki fyrr en lokið er störfum þeirra nefnda sem um ráðninguna fjalla. 

Umsækjendur skulu láta eftirfarandi gögn fylgja umsókn sinni. 
1. Kynningarbréf þar sem m.a. kemur fram hvernig umsækjandi uppfyllir hæfniskröfur
2. Vottorð um námsferil sinn
3. Akademíska ferilskrá (Curriculum Vitae)
4. Ritaskrá (auðkenna ber ritrýnt efni sérstaklega) 
5. Skýrslu um vísindastörf og önnur störf sem þeir hafa unnið
6. Greinargerð um rannsóknar- og kennsluáform ef til ráðningar kemur
7. Upplýsingar um þrjá mögulega umsagnaraðila sem hafa má samband við. 

Í umsókn skal koma fram hver ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skulu umsækjendur gera grein fyrir framlagi sínu til verksins. Enn fremur er ætlast til þess að umsækjendur láti fylgja með umsagnir um kennslu- og stjórnunarstörf sín eftir því sem við á. 

Umsókn og umsóknargögnum sem ekki er skilað rafrænt skal skila í tvíriti til vísinda- og nýsköpunarsviðs Háskóla Íslands, Sæmundargötu 6, 101 Reykjavík. 

Um meðferð umsókna, mat á hæfni umsækjenda og ráðningu í starfið er farið eftir ákvæðum laga nr. 85/2008 um opinbera háskóla og reglna nr. 569/2009 fyrir Háskóla Íslands. Samkvæmt 38. gr. reglnanna er rektor heimilt að veita framgang í starf dósents eða prófessors við nýráðningu uppfylli viðkomandi þau skilyrði. 

Öllum umsækjendum verður svarað og þeim tilkynnt um ráðstöfun starfsins þegar ákvörðun hefur verið tekin. Umsóknir geta gilt í allt að sex mánuði frá lokum umsóknarfrests. 

Við ráðningu í störf í Háskóla Íslands er tekið mið af jafnréttisáætlun skólans, sjá hér: http://www.hi.is/haskolinn/jafnrettisaaetlun#markmid2.

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands.

Félagsráðgjafardeild Háskóla Íslands er ein sex deilda Félagsvísindasviðs. Fyrstu félagsráðgjafarnir útskrifuðust 1982 en greining varð sjálfstæð deild árið 2008. Við deildina er boðið uppá BA- og MA nám til starfsréttinda í félagsráðgjöf, auk fjölda þverfaglegra framhaldsnámsleiða og doktorsnám. 

Á Félagsvísindasviði starfa á þriðja hundrað manns að kennslu og rannsóknum. Vísindafólk sviðsins stundar grunnrannsóknir, hagnýtar rannsóknir og þjónusturannsóknir og lögð er áhersla á fjölbreytta miðlun þekkingar, öflugar samræður víð íslenskt samfélag og alþjóðlega fræðasamfélagið. 

Háskóli Íslands er alþjóðlegur rannsóknaháskóli og stærsta kennslu-, rannsókna- og vísindastofnun landsins. Um 1.500 starfsmenn starfa í föstum störfum við skólann og um 2.200 eru lausráðnir. Nemendur við skólann eru um 12.500. Skólinn skiptist í sex grunneiningar, miðlæga stjórnsýslu og fimm fræðasvið. Háskóli Íslands býður fjölbreytt nám á öllum stigum og er eini háskóli landsins sem býður grunn- og framhaldsnám á öllum helstu fræðasviðum. 

Starfshlutfall er 100%
Umsóknarfrestur er til og með 16.12.2019

Nánari upplýsingar veitir
Guðný Björk Eydal - [email protected] - 525 4258


Háskóli Íslands
Félagsráðgjafardeild
Sæmundargötu 4
101 Reykjavík


Smelltu hér til að sækja um starfið
 

 

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira